Ózbekstan Gaza sektorynyń turǵyndaryna kómek retinde $1,5 mln bóledi

<p>Ózbekstan Gaza sektorynyń turǵyndaryna kómek retinde Birikken Ulttar Uıymynyń Taıaý Shyǵystaǵy agenttigine $1,5 mln bólmek. Bul týraly energetıka júıesin kúzgi jáne qysqy maýsymǵa daıyndaýǵa arnalǵan jıyn barysynda Ózbekstan prezıdenti Shavkat Mırzıeev aıtty, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Ózbekstan Prezıdenti baspasóz qyzmetiniń habarlaýynsha, Shavkat Mırzıeev kún tártibine qoıylyp otyrǵan negizgi másele týraly sóz qozǵamastan birden búkil álemdi tolǵandyryp otyrǵan jaǵdaıǵa kóshti.

«Izraıl áskeri men HAMAS qozǵalysy arasyndaǵy qarýly qaqtyǵys gýmanıtarlyq daǵdarysty órshitti, esh kinási joq beıbit turǵyndar arasynda ólim kóbeıdi. Qurbandardyń arasynda áıelder men balalar da bar, sondaı-aq osy shıelenis saldarynan turǵyndar baspanalarynan aırylyp, týǵan jerin tastap ketýge májbúr bolyp otyr. Biz Palestına men Izraıl tarapynan qurban bolǵandardyń barlyǵynyń qaıǵysyna ortaqtasyp, otbasylaryna kóńil aıtamyz. Men Birikken Ulttar Uıymynyń Taıaý Shyǵystaǵy agenttigine Gaza sektorynyń turǵyndaryna kómek retinde 1 mln 500 myń teńge bólý týraly sheshim shyǵardym. Biz Palestına halqymen birgemiz jáne olardyń BUU Qaýipsizdik Keńesi men Bas Assambleıasy qabyldaǵan rezolıýtsııalar aıasynda táýelsiz memleket qurý jónindegi quqyqtaryn qoldaımyz»,-dedi Ózbekstan prezıdenti.

Sondaı-aq ol eki tarapty da dereý tatýlasyp, qarýly qaqtyǵystardy toqtatýǵa, shıelenisti beıbit jolmen sheshýge shaqyrdy.

Mırzıeev Ortalyq Azııa óńirinde túrli ulttar men konfessııa ókilderiniń tatý-táttir ómir súrý tájirıbesi bar ekenin atap ótti.

«Birneshe ǵasyr boıy munda ózara senim men dostyqta musylman, hrıstıan jáne ıýdeıler ómir súrip jatyr. Osy múmkindikti paıdalana otyryp, men ózimizdiń otandastarymyzdy ásirese jastardy túrli arandatýlarǵa aldanyp, zańsyz áreketterge barmaýǵa shaqyrǵym keledi. Biz birlik pen ózara túsinistikte ótip jatqan beıbit tynysh ómirimizdi saqtaýymyz kerek, ol bizdiń eń basty kúshimiz jáne baǵa jetpes baılyǵymyz»,-dedi Shavkat Mırzıeev.