Ózbekstan betti tumshalaıtyn kıim kııýge, kóp áıel alýǵa zańmen tyıym saldy

TAShKENT. QazAqparat – Ózbekstannyń Olıı Májilisi eldiń Qylmystyq kodeksine jáne Ákimshilik jaýapkershilik týraly kodekske ózgeris pen tolyqtyrý engizetin zań jobasyn maquldady, dep habarlaıdy QazAqparat.

Qujatqa sáıkes, ózbekstandyqtar kelesi quqyqbuzýshylyqtar úshin jaýapkershilikke tartylatyn bolady:

- ulty, násili, etnıkalyq jáne dinı belgileri boıynsha azamattardyń ústemdigin nemese tolymsyzdyǵyn nasıhattaý;

- zań tártibimen tirkelmegen nekeni dinı rásimmen qııý;

- eki jáne odan kóp áıelmen birge turýdy nasıhattaý;

- áıelder men erlerdiń teń quqyǵyn ashyq túrde moıyndamaý;

- azamattyń bet-beınesin tanýǵa kedergi keltiretin kıim-keshekti qoǵamdyq orynda kıip júrý.

Aıta keteıik, medıtsınalyq dıagnozy bar adamdarǵa jáne qyzmettik mindetin atqaratyn mamandarǵa bet-beıneni tumshalaıtyn kıim kııýge tyıym salynbaıdy. Budan bólek, jol qozǵalysy qaýipsizdigin qamtamasyz etý kezinde, nemese sporttyq jáne ózge de mádenı-buqaralyq sharalar kezinde, zańmen ruqsat etilgen ózge de jaǵdaılarda qoldanylatyn arnaıy bas kıimderge tyıym qarastyrylmaǵan.