Ózbekstan balalarǵa qarsy qylmys jasaǵandardyń arnaıy tizimin jasaıdy

<p>Ózbekstan úkimeti kámeletke tolmaǵandarǵa qatysty qylmys jasaǵan adamdardyń reestrin júrgizý tártibin bekitti. Bul týraly ÓR Olıı Májilisi Senatynyń tóraǵasy Tanzıla Narbaeva óziniń áleýmettik jelidegi resmı paraqshasynda jazdy, dep habarlaıdy <a href="https://kaz.inform.kz/" target="_blank" rel="noopener">Kazinform</a> agenttiginiń menshikti tilshisi.&nbsp;</p>

«Endi kámeletke tolmaǵandarǵa qatysty jynystyq zorlyq-zombylyq jasaǵan adamdarǵa balalarmen jumys isteýge qatań tyıym salynady», - dep jazdy Tanzıla Narbaeva óziniń Telegram arnasynda.

Sondaı-aq ol sáýirde kámeletke tolmaǵandarǵa qatysty zorlyq-zombylyq jasaǵandarǵa bilim, bala tárbıeleý, saýyqtyrý, shyǵarmashylyq uıymdarda qyzmet etýine tyıym salatyn zań qabyldanǵanyn eske saldy.

Keshe úkimettiń arnaıy qaýlysymen kámeletke tolmaǵandarǵa qatysty jynystyq zorlyq-zombylyq jasaǵan adamdardyń reestrin júrgizý tártibi bekitildi.

Oǵan qasaqana kisi óltirgen, kámeletke tolmaǵandardyń ar-namysyna qol suqqan, jasóspirimder beınelengen pornografııalyq ónimdi taratqan, jezóksheler úıin uıymdastyrǵan, terrorızm, sondaı-aq qylmystyń basqa da túrleri úshin buryn sottalǵan adamdar engiziledi.

Reestr arnaıy aqparattyq júıe arqyly júrgiziledi.

«Reestrge engizilgen adamdardy jumysqa qabyldaý máselesi osy aqparattyq júıeden alynǵan aqparat negizinde baqylanady», - dep málim etti Tanzıla Narbaeva.