Ózbekstan aýyl sharýashylyǵy ónimderiniń eksportyn 3,5 mlrd dollarǵa deıin ulǵaıtpaq

<p>TAShKENT. KAZINFORM &ndash; Ózbekstan jemis-jıdek, kókónis jáne azyq-túlik ónimderiniń eksportyn 3,5 mlrd dollarǵa deıin arttyrýǵa nıetti. Bul týraly Ózbekstan prezıdenti Shavkat Mırzıeevtiń qatysýymen ótken aýyl sharýashylyǵy salasyn damytý máseleleri jónindegi keńeste aıtyldy. Bul týraly Kazinform agenttiginiń Tashkenttegi menshikti tilshisi Álıhan Asqar habarlady.</p>

Byltyr respýblıkanyń aýyl sharýashylyǵy salasyndaǵy ósim 4,1 paıyzdy qurap, ónim eksporty 2 mlrd dollarǵa jetti. Salaǵa halyqaralyq uıymdar men qarjy ınstıtýttarynyń 20 mln dollarǵa teń granty tartylyp, zerthanalar jáne qajetti jabdyqtar jańartyldy.

«Keıingi jyldary álemniń 80 eline aýyl sharýashylyǵy ónimderin eksporttaýǵa 620 fıtosanıtarııalyq ruqsat alynyp, olarmen elektrondyq formatta derek almasý isi jolǵa qoıyldy. «GSP+» júıesi aıasynda 200 myń gektar jer halyqaralyq talaptarǵa sáıkestendirildi», - dep málim etti Ózbekstan basshysynyń baspasóz qyzmetinen.

Keńeste salanyń eksporttyq áleýeti munymen shektelip qalmaıtyny atap ótildi. Jaýapty tulǵalar bıyl aýyl sharýashylyǵy ónimderiniń eksportyn 3,5 mlrd dollarǵa deıin jetkizý múmkindigin baıandady. 

Ol úshin birinshi kezekte jemis-jıdek, kókónis, baqsha ónimderi, júzim jáne dándi-burshaqty daqyldar óndirisi ulǵaıady. Óńirlerde taǵy 20 mobıldi zerthana qurylyp, olar «uzagrolab.uz» elektrondyq platformasyna qosylady. Buǵan qosa pestıtsıdterdiń aınalymyna baılanysty barlyq protses tsıfrlandyrylady. 

Sondaı-aq 6 myń baqsha, 3 myńnan astam júzim alqaby men egistik alań, 344 ónimdi qaptaýmen aınalysatyn kásipornnyń jumysy sheteldik fıtosanıtarııalyq talaptarǵa sáıkestendiriledi. Tıimdi tehnologııalar engizilip, jándik jáne ózge de zııankesterimen bıologııalyq kúrestiń jańa mehanızmi iske qosylady.

Halyqaralyq yntymaqtastyqty kúsheıtý sheńberinde taýar eksporty neǵurlym qymbat naryqtarǵa baǵdarlanady. Bul rette taǵy 8 eldiń fıtosanıtarlyq ruqsatyn alý josparlanǵan.

Ferǵana, Samarqand jáne Tashkent halyqaralyq áýejaılarynyń aýmaǵynda eksportqa shyǵatyn jemis-jıdek pen kókónisti ýaqytsha saqtaıtyn zamanaýı obektiler salynady.