Ózbekstan astanasy eki aptalyq karantınge jabylady

TAShKENT. QazAqparat - Ózbekstan astanasy epıdemıologııalyq jaǵdaıdyń ýshyǵýyna baılanysty eki aptalyq karantınge jabylady. Mundaı sheshimdi koronavırýsqa qarsy is-qımyl jónindegi arnaıy respýblıkalyq komıssııa qabyldady, dep habarlaıdy QazAqparat.

«28 maýsymnan bastap 12 shildege deıin Tashkentke kórshi oblystardan avtokólik quraldarymen (avtomobılder men avtobýstar) kirýge shekteý qoıylady. 28 maýsymnan bastap búkil el boıynsha barlyq oıyn-saýyq nysandary (meıramhanalar, túngi klýbtar, karaoke, bılıard jáne kompıýter zaldary, qoǵamdyq tamaqtaný oryndary-kafeler, ashanalar men shaıhanalar) keste boıynsha 8:00-den 20:00-ge deıin jumys isteıdi. Al osy mekemelerge kelýshiler sany jalpy kólemniń 50%-nan aspaýy tıis», - delingen Ózbekstan Respýblıkasynyń Densaýlyq saqtaý mınıstrliginiń habarlamasynda.

Esterińizge sala keteıik, Ózbekstanda KVI aýrýynyń turaqty ósýi baıqalady. Ótken táýliktiń ózinde koronavırýspen aýyratyn 476 naýqas tirkeldi.

Onyń ishinde eń kóp aýyrǵandar respýblıka astanasynda – 135 adam.

Aýrýhanalarda kovıd rastalǵan 3571 naýqas bar.