Ózbekstan ardagerleri qazaqstandyq ınternatsıonalıst jaýyngerlerdi quttyqtady

TAShKENT. QazAqparat - Keńes áskerleriniń Aýǵanstan jerinen shyǵarylǵanyna 34 jyl tolýyna oraı Ózbekstan Respýblıkasynyń «Ardager» jaýynger-ınternatsıonalıster qaýymdastyǵynyń tóraǵasy Talat Mýradov Aýǵanstanda ınternatsıonaldyq boryshyn ótegen burynǵy Keńes Odaǵy respýblıkalarynyń kóptegen jaýyngerleri Ferǵana, Shyrshyq jáne Termez qalalaryndaǵy oqý oryndarynan attandyrylǵanyn aıtty, dep habarlaıdy QazAqparat tilshisi.

Ardagerdiń aıtýynsha, 15 aqpan aýǵan jaýyngerleri úshin ári merekelik, ári qasiretti kún.

«Aýǵanstan arqyly Keńes Odaǵynyń túkpir-túkpirinen 750 myńǵa jýyq soldattar pen ofıtserler ótti. Qurama komandalar Aýǵanstanǵa jiberilmes buryn Ferǵana, Shyrshyq jáne Termezdegi oqý jattyǵýlarynan ótti. Bul soǵys talaı adamnyń ómirin qıdy, tek Ózbekstannan osy 9,5 jyl ishinde 1545 adam qaza tapty. Sol ýaqyttan beri biz soǵystan alǵan jaraqat pen dertten kóz jumǵan taǵy 6 myń adamnan aıyryldyq», – deıdi Talat Mýradov.

Ol ómir men ólim arasynda arpalysqan ınternatsıonalıst-jaýyngerler Paryz, Namys, Dostyq sózderiniń maǵynasyn tereń túsinetinin aıtyp ótti. Ardagerler áli kúnge TMD elderinde jáne alys shetelderde turatyn qarýlas joldastarymen turaqty baılanysta.

«Qazaqstanda birneshe ardagerler uıymy bar, biz olarmen dostyq baılanystamyz. Solardyń biri – meniń dosym ári áriptesim, Qazaqstandaǵy aýǵan jaýyngerleri uıymynyń tóraǵasy Sháripbaı Ótegenov. Ol sondaı-aq TMD elderiniń jaýynger-ınternatsıonalıster isteri jónindegi komıtetiniń birinshi orynbasary. Ótken jyly qazaq dostarymyzdyń Ózbekstan, Tájikstan, Qyrǵyzstan jáne Qazaqstan ardagerleriniń birikken avtosherýin uıymdastyrýy óte qyzyqty aktsııa boldy. Olar Ferǵanadan shyǵyp, Tashkentke, odan keıin Shymkentke, Túrkistanǵa, Qyzylordaǵa bardy», - dedi ardager.

«Biz bul dostyqty óte joǵary baǵalaımyz. Áıelim túrkistandyq bolǵandyqtan, men qazaq eline kúıeý balamyn. Qazaqstanǵa jıi baramyn, jaýyngerlik dostarmen jıi bas qosamyz. Bizdiń bar kúshimiz kópultty otbasylyq dostyǵymyzda. Osy sátti paıdalana otyryp, Qazaqstandaǵy barsha jaýynger joldastarymdy osydan 34 jyl buryn soǵysty tastap, beıbit ómirge qadam basqan merekelerimen quttyqtaǵym keledi. Alla halyqtarymyzǵa tynyshtyq pen baq-bereke bersin», - dep Talat Mýradov qazaqstandyq ınternatsıonalıst jaýyngerlerdi quttyqtady.

Shara aıasynda Aýǵan soǵysy jaýyngerlerine arnalǵan eskertkishke gúl shoqtary qoıyldy. Sońynda ardagerlerge áskerı ánder kontserti usynylyp, jaýyngerlik dastarhan jaıyldy.

Eske sala keteıik, 15 aqpan - Keńes áskerleriniń shekteýli kontıngentiniń Aýǵanstannan shyǵarylǵan kúni. Osy oqıǵaǵa oraı Astanada qaza tapqan aýǵan jaýyngerlerine arnalǵan eskertkishte mıtıng ótip, gúl shoqtary qoıyldy.