Ózbekstan Araldyń keýip qalǵan tabanyna sekseýil egýdi jalǵastyryp jatyr

<p>Ózbekstannyń Tótenshe jaǵdaılar mınıstrligi Aral teńiziniń túbin kógaldandyrýdyń kezekti maýsymyna daıyndalyp jatyr, dep habarlaıdy <a href="https://kaz.inform.kz/" target="_blank" rel="noopener">Kazinform</a> vedomstvoǵa silteme jasap.&nbsp;</p>

Aıta keteıik, 2018 jyly Ózbekstan prezıdenti Shavkat Mırzıeevtiń tapsyrmasy boıynsha Aral teńiziniń túbin kógaldandyrý boıynsha aýqymdy memlekettik baǵdarlama bastalǵan. 

Bul bastamanyń maqsaty — sý qoımasynyń kebýinen týyndaǵan ekologııalyq apattyń saldaryn azaıtý.

Sońǵy jyldary TJM jáne orman sharýashylyǵy agenttiginiń kúshimen teńizdiń qurǵap qalǵan túbinde shól ósimdikterinen orasan zor jasyl alqaptar paıda boldy.

Foto: Ózbekstan TJM

Jaqynda kóshet egý maýsymy qaıta bastalady.

Birneshe apta boıy TJM qyzmetkerleri sekseýil tuqymyn daıyndaýmen aınalysty, endi ol avıatsııanyń kómegimen teńiz túbine sebiledi. 

Eske sala keteıik, bul jumysty Qazaqstan tarapy da júrgizip jatyr. 

Prezıdent Qasym-Jomart Toqaev 2021-2025 jyldar aralyǵynda Araldyń tabanynda 1,1 mln ga aýmaqqa aǵash otyrǵyzýdy mindettegen. 

Tapsyrmaǵa sáıkes, Qyzylorda oblysynda orman sharýashylyǵy jáne janýarlar dúnıesi komıteti, sonymen qatar orman mekemeleriniń kúshimen byltyr 100 myń ga jerge sekseýil kósheti otyrǵyzyldy.

Al, 2022-2025 jyldar aralyǵynda jyl saıyn 250 myń ga alańda aǵash otyrǵyzylady.