Ózbekstan 2030 jylǵa qaraı Aral qaırańynyń 78% jasyl jelekke aınaldyrmaq

<p>Biz jyl saıyn Aral qaırańynyń 100 myń gektar aýmaǵyna tuz ben shólge shydamdy ósimdikter otyrǵyzýǵa tyrysamyz. Samarqand qalasynda (Ózbekstan) ótip jatqan BUU-nyń Shóleıttenýmen kúres jónindegi konventsııasynyń (CRIC 21) otyrysynda Ózbekstan Orman sharýashylyǵy agenttiginiń bas mamany Hadjımýrat Tolıpov osylaı málim etti, dep habarlaıdy <a href="https://kaz.inform.kz/" target="_blank" rel="noopener">Kazinform </a>agenttiginiń menshikti tilshisi.&nbsp;</p>

«6 mln gektardy alyp jatqan teńiz bútin bir urpaqtyń kóz aldynda joıyldy. Búginde onyń 90 paıyzy joq. Sý resýrsynyń azdyǵyna baılanysty bul terrıtorııalarǵa sý baǵyttaı almaımyz. Tıisinshe, ol qum men tuz basqan shóleıtke aınaldy. Sondyqtan bizdiń aldymyzǵa osy jerlerge ósimdik egý mindeti qoıyldy. Ol jel saldarynan atmosferaǵa kóteriletin tuz ben qumdy daýyldardy azaıtýǵa yqpal etedi. Bastapqyda biz jylyna 16-18 myń gektar aýmaqqa jasyl jelek otyrǵyzdyq. Bul óte az, mundaı qarqynmen Aral qaırańyn ormanǵa aınaldyrýǵa 100 jyl keter edi», - dep toqtaldy Hadjımýrat Tolıpov.

Onyń sózinshe, 2018 jyldan bastap bul kólem ulǵaıtylǵan. Atap aıtqanda, keıingi 4 jylda Araldyń Ózbekstan terrıtorııasyndaǵy 1 mln 700 myń gektar aýmaǵyna tuzdy jerge shydamdy ósimdikter otyrǵyzyldy.

Foto: Álıhan Asqar/Kazinform

«Qazir sekseýil otyrǵyzý qıyndyq týǵyzatyn aımaqtar qalyp otyr. Jalpy biz jyl saıyn 100 myń gektar aýmaqty qamtýǵa tyrysamyz. Bul rette biz qazaqstandyq áriptesterimizben birlese jumys atqaramyz. Bir-birimizdiń tehnologııa, ádis-tásilderimizben tanysamyz. Biz birlesip qana Aral apatynyń saldaryn joıa alamyz. 2028 jylǵa qaraı Ózbekstan tarapy jalpy aýmaqtyń 60%-yn, al 2030 jylǵa jaqyn 78% paıyzyn jasyl jelekke aınaldyrý josparyn qoıyp otyr», - dedi H. Tolıpov.

Aıta keteıik, Prezıdent Qasym-Jomart Toqaev 2021-2025 jyldar aralyǵynda Araldyń tabanynda 1,1 mln ga aýmaqta aǵash otyrǵyzý mindetin qoıdy. Tapsyrmaǵa sáıkes, Qyzylorda oblysynda Orman sharýashylyǵy jáne janýarlar dúnıesi komıteti, sonymen qatar orman mekemeleriniń kúshimen 2021 jyly 100 myń gektar jerge sekseýil kósheti otyrǵyzyldy.

Foto: Álıhan Asqar/Kazinform

Al, 2022-2025 jyldar aralyǵynda jyl saıyn 250 myń ga alańda aǵash otyrǵyzylmaq. Ǵalymdardyń esepteýinshe, 1 gektar aýmaqtaǵy 4 jyldyq sekseýl jyl saıyn 1 158,2 keli kómirqyshqyl gazyn sińirip, 835,4 keli ottegin bóledi jáne 800 tonnadan astam qum men tuzdy ustap qalady.