Ózbekstan 17 myńnan asa sheneýnikti qysqartady

TAShKENT. QazAqparat - Ózbekstanda ákimshilik reforma aıasynda 17 myńnan astam sheneýnik qysqartylady. Ózbekstan prezıdenti Shavkat Mırzıeev «Respýblıkanyń atqarýshy bılik organdarynyń qyzmetin tıimdi jolǵa qoıý jónindegi bastapqy uıymdastyrý sharalary týraly» tıisti jarlyqqa qol qoıdy, dep habarlaıdy QazAqparattyń menshikti tilshisi.

Qujatqa sáıkes, mınıstrlikter men vedomstvolarda bıýdjettik jáne bıýdjettik emes qarajat esebinen qarjylandyrylatyn basshy jáne óndiristik personaldan barlyǵy 17 447 adam qysqartylady.

Bul - memlekettik qyzmetshilerdiń jalpy sanynyń 24 paıyzy.

Sonyń ishinde mınıstrlikter men vedomstvolar basshylarynyń orynbasarlarynyń sany 207-den 144-ke nemese 30%-ǵa qysqartyldy.

Mınıstrlikter men vedomstvolar qyzmetkerleriniń jalpy sany 56 573 shtatpen shektelgen.

Qaýlyda mınıstrlikter men vedomstvolardyń bıýdjettik emes qarajat esebinen basshy personaldyń qosymsha shtat engizýine úzildi-kesildi tyıym salynady.

Memlekettik apparatty reformalaý nátıjesinde 703 qyzmettik kólik pen 10 ǵımarat bosatyldy.

Aldyn ala boljam boıynsha, qyzmetkerlerdi qysqartý 1,5 trıllıon sýmdy (132 mıllıon dollar) únemdeıdi.

Qyzmettik kólikter sanyn azaıtý bıýdjetti taǵy 70 mıllıard sým (6 mıllıon dollar) únemdeıdi.

Aıta keteıik, Ózbekstan basshysy parlamentke jyl saıynǵy joldaýynda memlekettik basqarý salasynda aýqymdy reforma júrgiziletinin, onyń ishinde mınıstrlikter men vedomstvolar sanyn qazirgi 61-den 28-ge deıin qysqartatyn jańa reforma jarııalaǵan bolatyn.