Ózbekstan 16 naýryzdan bastap shekaradaǵy karantındik shekteýlerdi alyp tastaıdy

TAShKENT. QazAqparat – 16 naýryzdan bastap Ózbekstan Qazaqstan jáne Tájikstanmen ortaq shekarasyndaǵy ótkizý beketterinde birqatar karantındik sharalardy alyp tastaıdy, dep habarlaıdy QazAqparat tilshisi Ózbekstannyń Týrızm jáne mádenı mura mınıstrligine silteme jasap.

Vedomstvonyń habarlaýynsha, bul týrızmdi tez arada qalpyna keltirý úshin jasalyp otyr.

«Ózbekstannyń Qazaqstanmen shekarasyndaǵy barlyq ótkizý beketteri arqyly eki el azamattaryn erkin ótkizý boıynsha barlyq shekteýler alynady», - dep habarlaıdy vedomstvo.

Vaktsına pasporty nemese sertıfıkaty bar azamattar PTR-testin tapsyrmaı-aq elge erkin kire beredi. Atalǵan qujaty joq azamattar 72 saǵat ishinde jaramdy PTR-testiniń nátıjesin kórsetýi nemese shekaradan ótip, Ózbekstan aýmaǵyna kirgen kezde ekspress-test tapsyrýy kerek.

Sonymen qatar Ózbekstannyń Týrızm mınıstrligi Ózbekstan men Tájikstan aralyǵynda kólik qozǵalysyna qoıylǵan shekteýlerdiń alynatynyn málim etti. Tájikstan Respýblıkasymen shekaralas ótkizý beketteriniń jumysyn jandandyrý boıynsha tıisti sharalar qabyldanyp jatyr.

Eske sala keteıik, 2022 jyldyń 15 qańtarynda omıkron shtamynyń taralýyna baılanysty eki el azamattaryna Qazaqstan men Ózbekstan shekarasynan ótýge shekteý qoıylǵan.

Avtory: Mádıbek Jánibekov