Ózbekstan 15 balanyń ólimine sebep bolýy múmkin dárini satylymnan alyp tastady

TAShKENT. QazAqparat – Ózbekstan tumaý men sýyq tııýge qarsy úndilik «Dok-1 maks» preparatyn satýǵa ýaqytsha tyıym saldy. Atalǵan dári Samarqan oblysynda qaıtys bolǵan 15 balanyń ólimine sebep bolýy múmkin, dep habarlaıdy QazAqparat Ózbekstan Respýblıkasynyń densaýlyq saqtaý mınıstrligine silteme jasap.

Buǵan deıin áleýmettik jelilerde Samarqan oblysynyń kópsalaly balalar medıtsınalyq ortalyǵy basshysynyń 15 balanyń ólimin «Dok-1 maks» preparatymen baılanystyratyny týraly hat taraǵan bolatyn.

«Balalardyń kópshiliginde búırektiń zaqymdanǵany baıqaldy. Sońǵy eki aıda ortalyqqa osy dárini qabyldaǵannan janama áseri tıgen 21 naýqas keldi. Aýrý balalarda negizinen anýrııa baıqaldy. Onyń 17-siniń jaǵdaıy óte aýyr boldy, tipti birneshe ret gemodıalız jasaýǵa týra keldi. 15 adam qaza tapty», - delingen hatta.

Ózbekstan Respýblıkasy Densaýlyq saqtaý mınıstrliginiń habarlaýynsha, Farmatsevtıka salasyn damytý agenttigi jaǵdaıdy dereý baqylaýǵa alǵan.

Densaýlyq saqtaý mınıstrliginiń arnaıy jumys toby quryldy, onyń quramyna departamenttiń, Respýblıkalyq sot-medıtsınalyq saraptama ǵylymı-praktıkalyq ortalyǵynyń qyzmetkerleri, balalar nefrologtary, pedıatrlar kiredi.

«Samarqan dárihanalarynda satylǵan úndilik Marion Biotech Pvt. Ltd kompanııasynyń lımon jáne bal dámi bar Dok-1 maks dárileri belgilengen tártippen saraptamadan ótedi. Zerthanalyq taldaý aıaqtalǵannan keıin nátıjesi kópshilikke jarııalanady. 2022 jyldyń 22 jeltoqsanynan bastap elimizde bul preparattardy satý ýaqytsha toqtatyldy», - dedi vedomstvo.