Ózbekáli Jánibekovtiń 90 jyldyǵyna oraı respýblıkalyq konferentsııa ótti
Ǵylymı konferentsııa barysynda O. Súleımenov, M. Joldasbekov, M. Jurynov, S. Tereşenko, Q. Sultanov syndy belgili qoǵam qaıratkerleri sóz alyp, aıtýly tulǵanyń eńbegi týraly estelikterimen bólisti.
«Ózbekáli Jánibekovtiń jasaǵan jumystaryn biz endi túsinip jatyrmyz. Onyń tikeleı aralasýymen Alash arystary aqtalǵan edi. Bul ispen ol tynymsyz eńbek etti. Onyń arqasynda Shákárim, Maǵjan Jumabaev jáne t.b. esimderi elmen qaıta qaýyshty. Mundaı basshylar bizge kerek edi, búgin de kerek jáne árqashan qajet bolady. Sondyqtan da biz Ózbekáli Jánibekovti osy tıptegi basshy retinde únemi eske alamyz, dedi, - óz sózinde Qazaqstannyń Eńbek Eri Oljas Súleımenov.
Myrzataı Joldasbekov Ózbekáli Jánibekovpen birge jumys istegen kezderin eske aldy.
«Meni qasynan qaldyrmaıtyn, el aralap birge júrdik. Qazaqtyń oı-sanasy týraly aıtqandy jaqsy kóretin. Sóılep ketse, keýdesi keńsaraı edi. Ózi tarıhshy, etnograf boldy. Birtalaı kitaptar jazdy. Jany taza adam edi. Memleket múlkine esh qol suqpaǵan adam», - dedi ol.
Senat depýtaty Altynbek Nuhuly Arystan bab qoryq mýzeıi mańyndaǵy jabylyp qalǵan Ózbekáli Jánibekov mýzeıi tarıhı-etnologııalyq sıpatta qatarǵa qaıta qosý, Túrkistan qalasynda keń kóshege esimin berip, eskertkishin ornatý, 5 tomdyq shyǵarmalar jınaǵyn tolyqtyryp jaryqqa shyǵarý jáne ómirinen derekti kıno týyndylar jasaý, ózi oqyǵan Abaı atyndaǵy Qazaq ulttyq pedagogıkalyq ýnıversıtetinde Ózbekáli Jánibekov atyndaǵy aýdıtorııany ashý, sondaı-aq halyqaralyq ǵylymı-praktıkalyq konferentsııa ótkizý týraly usynystaryn jetkizdi.
Alqaly jıyn barysynda Qanysh Sátbaevtyń memorıaldyq murajaıy tarapynan QR Memlekettik muraǵatynan alynǵan qujattar men fotosýretter qoıylǵan Ózbekáli Jánibekovtiń ómiri men qaıratkerlik qyzmetine qatysty kórme uıymdastyryldy. Olardyń qatarynda Búkilálemdik ıÝNESKO tizimine engen mádenı mura qujattarynyń kóshirmesi bar.
Avtory: Dýman Arǵyngeldi