Ózbek mádenı ortalyǵynyń tóraǵasy Ikram Hashımjanov: Sabaqtastyq - zamana talaby

NUR-SULTAN. QazAqparat - Bıylǵy jyl túrli mańyzdy oqıǵalarǵa toly. Atap aıtqanda, Qazaqstan halqy Assambleıasynyń XXVII-sessııasy ótti, Ózbekstanda Qazaqstan jyly saltanatpen ashyldy, elimizde kezekten tys Prezıdent saılaýy taǵaıyndaldy. Qazaqstan ózbekteri etnomádenı birlestikteriniń «Dýstlık» qaýymdastyǵynyń músheleri barsha qazaqstandyqtarmen birge osy is-sharalardy qoldap, barynsha atsalysýda, - deıdi Túrkistan oblysyndaǵy Ózbek mádenı ortalyǵynyń tóraǵasy Ikram Hashımjanov.

«Bıylǵy sessııada sóılegen sózinde Elbasy Assambleıa jobalarynyń ómirsheńdigi, reformalar júrgizýdegi sabaqtastyq týraly aıta kelip, ishki armanyn da jasyra almady. «Eger Qazaqstan halqy assambleıasynyń músheleri men búkil kópultty qazaqstandyqtar memlekettik tilge bet bursa, biz budan bir-birimizge jaqyn bola túsip, bir-birimizdi jaqsyraq túsinetin bolamyz... Men, sirá, eki tilde birdeı sóıleýge týra keletin sırek prezıdentterdiń biri shyǵarmyn. Al men tek memlekettik tilde ǵana sóıleıtin jáne bári meni túsinetin kúndi armandaımyn», - dedi ol memlekettik til máselesine toqtalǵanda».

Sondaı-aq Ikram Hashımjanov oblystyq ózbek mádenı ortalyǵy Túrkistan oblystyq assambleıasy jáne oblystyq bilim, tilderdi damytý basqarmalarymen birlesip, udaıy «Memlekettik tildi bilý paryzyń», «Memlekettik til - dostyqtyń dánekeri» atty baıqaý ótkizetindikterin aıtady. Baıqaý jeńimpazdaryna joǵary oqý oryndarynda grantpen bilim alýy úshin sertıfıkattar tapsyrylady. Bul sertıfıkattardy memlekettik tildyń janashyrlyq tanytatyn JOO basshylary berýde.

«Assambleıanyń sońǵy sessııasynda elimizde ótetin mańyzdy saıası naýqan - prezıdent saılaýy týraly da ózara oı bólistik», -deıdi mádenı ortalyqtyń tóraǵasy.