Ózbek loýkosteri «My Freighter» Qazaqstanǵa áýe reısterin ashady

ASTANA. QazAqparat – Ózbestannyń «My Freighter» (Centrum Air) loýkosteri Qazaqstanǵa áýe reısterin ashady. Bul jaıynda Azamattyq avıatsııa komıtetinen málim etti, dep habarlaıdy QazAqparat tilshisi.

«Indýstrııa jáne ınfraqurylymdyq damý mınıstrliginiń Azamattyq avıatsııa komıteti halyqaralyq reıster sanyn arttyrý, sonymen qatar «ashyq aspan» rejımin júzege asyrý jumystary aıasynda Ózbekstannyń avıatsııalyq bıligimen birge ózbekstandyq bıýdjeti tómen «My Freighter» (Centrum Air) áýe kompanııasynyń Qazaqstanǵa turaqty jolaýshylar reısin ashý máselesin pysyqtady», - delingen vedomstvo aqparatynda.

Komıtet málimetinshe, atalǵan kompanııa 5 maýsymnan bastap, A-320 áýe kemesimen Almaty-Tashkent baǵytynda aptasyna 3 reıs jıiligimen (dúısenbi, sársenbi, juma) turaqty tikeleı jolaýshylar reısin júzege asyrýdy bastaıdy.

Qazaqstan men Ózbekstan arasyndaǵy reıster sanynyń artýy eki eldiń arasyndaǵy saýda-ekonomıkalyq, týrıstik, mádenı yntymaqtastyqty odan ary damytýǵa septigin tıgizedi. Sondaı-aq áýe bıletiniń qunyn tómendetýge múmkindik beredi.