Ózbek ǵalymdary koronavırýstyń 32 genomyn ashty

TAShKENT. QazAqparat – Ózbekstan Respýblıkasynyń genomıka jáne bıoınformatıka ortalyǵynyń ǵalymdary SARS-CoV-2 vırýsynyń 32 genomyn túgeldeı ashty. Bul týraly «QazAqparat» HAA Ózbekstannyń Ǵylym Akademııasynyń baspasóz qyzmetine silteme jasaı otyryp habarlaıdy.

Ǵalymdar mundaı qorytyndyǵa vırýstyń bastapqy belgileri rastalǵan 62 adamnyń synamasyn tekserý arqyly kelgen. Resmı aqparatta olardyń bári Tashkent oblystyq sanıtarlyq-epıdemıologııalyq qadaǵalaý jáne qoǵamdyq densaýlyq saqtaý basqarmasy men Biogen Med jeke klınıkasynyń ókilderi ekeni aıtylǵan. Synama alynǵan 62 adamnyń 32-si DNQ tizbegin zamanaýı sekvenatordyń kómegimen oqý arqyly taldaýdan ótken.

«Ǵalymdar birqatar bıoınformatıka taldaý arqyly Ózbekstanda taralǵan vırýstyń nusqalaryn osy ýaqytqa deıin oqylǵan koronavırýs deker qoryndaǵy genomdarmen salystyrdy. Nátıjesinde Ózbekstanda COVID-19-nyń 18 nusqasy anyqtaldy. Osyǵan baılanysty Ózbekstan óz aýmaǵynda koronavırýs DNQ-synyń barlyq nusqasy ashylǵan 50 eldiń qataryna kirdi», - dep jazady ortalyq mamandary.

Ǵylymı ortalyq ókilderi anyqtalǵan aqparat elde kezdesetin COVID shtamdaryna qarsy ulttyq vaktsınany odan ári damytý úshin mańyzdy dep otyr.

Eske sala ketsek, Qazaqstan koronavırýs genomyn zertteýdi byltyr mamyr aıynda qolǵa alǵan edi.

Avtory Mádibek Jánibekov