Ózara yntymaqtastyqty ilgeriletý úshin 5 memleket arasynda «Túrki ınvestıtsııalyq qory» qurylmaq

ASTANA. QazAqparat – «Túrki ınvestıtsııalyq qoryn qurý týraly kelisimge qol qoıý týraly» Prezıdent Jarlyǵynyń jobasy Memleket basshysynyń qaraýyna engiziledi. Kelisim qujaty «Ashyq» NQA portalynda jarııalandy, dep habarlaıdy QazAqparat tilshisi.

«Túrki ınvestıtsııalyq qoryn qurý ózara múddeli salalardaǵy damý jobalaryn qoldaýda tsıfrlyq ınfraqurylym, ónerkásiptik óndiris, ınfraqurylym, kólik, aýyl sharýashylyǵy, aqparattyq-kommýnıkatsııalyq tehnologııalar, jasyl ekonomıka, týrızmdi qosa alǵanda, óńirishilik saýdany damytýǵa, shaǵyn jáne orta bıznes jobalaryn qarjylandyrýǵa, kóliktik-logıstıkalyq tizbekterdi, saqtaý jáne óndiristik qýattardy keńeıtýge qoldaý kórsetýge, fızıkalyq jáne óndiristik qorlardy qurýǵa jáne jańǵyrtýǵa yqpal etedi. Baıandalǵannyń negizinde Úkimet «Túrki ınvestıtsııalyq qoryn qurý týraly» QR Prezıdenti Jarlyǵynyń jobasyn qaraýǵa engizedi», - dep jazylǵan qujatta.

Investıtsııalyq qordy qurý úshin respýblıkalyq bıýdjetten 100 mln dollar bólinedi.

Aıta keteıik, qordyń quryltaıshylar – Qazaqstan, Ázerbaıjan, Qyrǵyzstan, Túrkııa jáne Ózbekstan memleketteri. 2021 jyly 12 qarashada Ystambul qalasynda atalǵan elderdiń basshylary «Túrki ınvestıtsııalyq qoryn» qurý týraly sheshimge kelgen bolatyn.

Qujat 29 naýryzǵa deıin kópshilik talqylaýda bolady.