Ózara túsinistik, birin-biri syılaý: ShQO-daǵy qos ustazdyń shańyraǵyndaǵy qaǵıdalar qandaı

<p>ÓSKEMEN. KAZINFORM &ndash; Shyǵys Qazaqstan oblysy Altaı aýdanynda turatyn Qydyrhanovtar otbasy 4 bala tárbıelep otyr. Otaǵasy Aslan Bazarbekuly eńbek pániniń ustazy, qolóner sheberi. Túrli-tústi metalldan sándi buıymdar jasaıdy. Jubaıy Ardaq Áýelbekqyzy matematıka pániniń muǵalimi.</p>

Ekeýi de óz mamandyqtary boıynsha respýblıkalyq baıqaýlardyń jeńimpazdary. Qyzdary Arna bıyl «Altyn belgi» ıegeri atanǵan. Shańyraǵyna shattyq uıalaǵan januıa jaqynda ShQO boıynsha ótken «Mereıli otbasy» baıqaýynyń jeńimpazy atandy.

Kazinform tilshisi Aslan Bazarbekulyn áńgimege tartyp, otbasy baqytynyń qupııasy qandaı ekenin bilip kórdi.

- Áńgimemizdi jubaıyńyzben qalaı tanysqandaryńyzdan bastasaq...

- Jan jarym Ardaqpen mektepke is-tájirıbeden ótýge kelgende tanystyq. Tanystyǵymyz sezimge ulasyp, 2003 jyly shańyraq kóterdik. Otbasymyzdyń bosaǵasy berik, ishiniń jaılylyqqa tolýynda qosaǵymnyń eńbegi zor. Ózi qolónerden alys emes, ismer jan. Jumysta isine jaýapty qyzmetker. Al úıde otbasymyzdyń uıytqysy, balalaryna meıirimdi ana. Úı sharýasy men jumysty teń ustap, bárine úlgerýge tyrysady. S.Amanjolov atyndaǵy ShQÝ-da matematıka bilim berý baǵdarlamasy boıynsha bilim alǵan. Qazir mektepte matematıka pániniń muǵalimi. Jarymnyń ákesi temirden túıin túıgen sheber, anasy da ismer adam. Jubaıym jumysyma baǵyt berip, isimizdiń ónimdi bolýyna sebepker.

- Ózińizdiń qolónerge degen qyzyǵýshylyǵyǵyz qalaı baıqaldy ?

- Qolónerge bala kezimnen qyzyqtym. Ákem men atam on saýsaǵynan óner tamǵan sheber kisi bolǵan. Asqar taýymnyń qasynan qalmaı istegen isin jadyma túıip júrdim. Ákem joqta quraldaryn alyp, abaısyzda ártúrli jaraqattar alǵanym áli este. Tyrnaǵymdy da talaı kestim, aıaǵymdy da baltamen uryp jaraqattaǵan kezderim boldy. Soǵan da qaramastan qolónermen aınalysýdy jalǵastyrdym. Mektep kezinde astaý, oryndyq, ústel, tósek, dombyra jasadym. Ózim dombyra shertpegennen keıin, ony jasaýdy qoıdym. Temirden de túıin túıgen kezderim boldy. Temirden pyshaq jasaýdy jetildirip, sharyqtaý shegine jetkende odan da qol úzdim. Jıhaz jasaýmen de aınalystym. Úıdegi ártúrli shkaf, tósek, ústel basqa da jıhazdar óz qolymnan shyqqan.

Foto: keıipkerdiń jeke arhıvinen

 

Sóıte kele, qolónerdiń ishinen janyma jaqynyn taptym. Qazir túrli-tústi metalldan sándi buıymdar jasaýǵa bet burdym. Asqan qyraǵylyqty talap etetin zergerlik ónerde bilimimdi tereńdetip jatyrmyn. 2018 jyly Astanaǵa baryp sheberlik sabaǵyn aldym. Qosymsha kitaptar satyp alyp óz betimmen de izdenip júrmin.

Qolónerdiń barlyǵyn ákem úıretti, arǵy atalarymyzdan kele jatqan óner desek te bolady. Ol kisiler bylǵarydan aıaq kıim de tikken eken. Bylǵarydan qamshy órýdi ákemniń aǵasynan úırengenmin.

- Balalaryńyz jaıly tolyǵyraq aıtyp ótseńiz...

- Jarym ekeýimiz tórt bala tárbıelep otyrmyz. Arna, Dana esimdi egiz qyzdarymyzdyń bireýi mektepti «Altyn belgi», bireýi «Úzdik atestatqa» bitirdi. Arna Semeı medıtsınalyq ýnıversıtetinde, Dana S.Amanjolov atyndaǵy ShQÝ-da ınformatıka páni muǵalimi mamandyǵyn oqyp jatyr. Ekeýi de mektepte ozat, halyqaralyq baıqaýlarda júldeger bolǵan. Úshinshi ulym byltyr 5 synyp oqyp júrgende aýdan, oblys deńgeıinde ǵylymı joba qorǵaǵan. Balalarymnyń jetistigi №9 mektep ustazdarynyń jemisi dep bilemin. Ulym da sýret salǵandy, aǵash jonǵandy jaqsy kóredi. Tórtinshi qyzym bıyl daıarlyq tobynda oqyp jatyr. Onyń da mektepte úzdik oqyp, óz jolyn tapqanyn qalaımyz.

- Otbasy baqytynyń formýlasy qandaı dep oılaısyz ?

- Otbasynyń baqytty bolýy qandaı da bir formýlada dep aıtpas edim. Biraq ár shańyraqtyń ózindik qaǵıdalary bar dep oılaımyn. Bizdiń otbasymyzdyń baqytynyń syry – tatýlyǵynda. Balalarymyzdyń, týystarymyzdyń arasynda yntymaqtastyq, aýyzbirshilik bolǵanyn nasıhattaımyz. Bir-birimizge syılastyq tanytyp, kerek kezde qol ushyn sozýǵa daıarmyz. Shańyraǵymyzdyń qaǵıdasy retinde bekitip qoımasaq ta, anasy ekeýimiz perzentterimizge únemi isimizben de sózimizben de úlgi bolýǵa tyrysamyz. Ózimiz de biz úlkenbiz demeı balalardyń pikirine qulaq asyp, tyńdap otyramyz. Olar da osyny úlgi etip, bir-birin tyńdap, syılap turady. Qazaqtyń «úlkenge – qurmet, kishige – izet» degen ustanymyna keletin tárizdi. Qaljyń sóz aıtsa da ótirik aıtpaýlaryn únemi eske salyp otyramyn.

- Otbasy múshelerimen ýaqytty qanshalyqty birge ótkizesizder ?

- Jumystan kelgennen keıin arqa-jarqa bolyp áńgimelesip, birge otyryp as ishemiz. Kishkentaı balalarymmen birge oınap, kóńil bólip, ákelik meıirimimdi kórsetýge tyrysamyn. Jazda sýdyń jaǵasynda demalǵandy unatamyz. Jalpy otbasynyń beriktigi birge kóp ýaqyt ótkizýinde de jatqan bolsa kerek. Sebebi basymyz qosylǵan sátte ashyq sóılesip, oıymyzben bólisip jaqyndyqty sezemiz.

- «Mereıli otbasy» baıqaýyna qatysý týraly oı qaıdan keldi ?

- «Mereıli otbasy» baıqaýy týraly mektep dırektorynan estidik. Ol kisi osy baıqaýda baq synap kórýge usynys jasady. Jarym da qyzyǵýshylyq tanytyp, qatysýǵa bel býdyq. Saıys talaptaryn oryndap, portfolıo jasaýda jarymnyń eńbegi zor. Otbasymyzdyń ómir tynysyn jaqsy jetkize bildi. Aýdandyq baıqaýda jeńimpaz atanǵanda júregimde erekshe sezim boldy. Ári qaraı oblys boıynsha da úzdik atandyq. Osy baıqaýǵa qatysqan ár januıanyń ózindik ereksheligi, basymdyǵy bar. Qazaqstannyń ár otbasynyń bosaǵasy berik, mereıi ústem bolsyn!

- Áńgimeńizge rahmet!