Óz jerimizde ótetin jarysqa tyńǵylyqty daıyndalýymyz kerek – Ermek Marjyqpaev

<p>ASTANA. KAZINFORM &mdash; Týrızm jáne sport mınıstri Ermek Marjyqpaev Astanadaǵy Alqa májilisinde elordada ótetin V Dúnıejúzilik kóshpendiler oıyndaryn uıymdastyrý jáne ótkizýge daıyndyq barysy týraly aıtty.&nbsp;</p>

Ol aldymen atalǵan dodada sportshylarymyzdyń sátti óner kórsetýine bar jaǵdaıdy jasaý kerek ekenin tilge tıek etti. 

«Osy jyldyń mańyzdy oqıǵalarynyń biri – elordada V Dúnıejúzilik kóshpendiler oıyndaryn uıymdastyrý jáne ótkizý. Baıraqty básekeniń salamatty ómir saltyn dáripteýdegi, baýyrlastyq baılanystardy arttyrýdaǵy mańyzyn Memleket basshysy Qasym-Jomart Kemeluly málimdegen bolatyn. «Sport – beıbitshilik elshisi» degen sóz bar. Sport arqyly ortaq qundylyqtardy qalyptastyrý, halyqtardy jaqyndastyrý ustanymyn kózdegen jón. Bul rette, Kóshpendiler oıyndaryna álemniń 100-den astam elinen delegatsııalar keledi dep kútilýde. Bul dodada sporttyq oıyndarmen birge mádenı jáne ǵylymı baǵdarlama da keńinen usynylady. At jalynda azamat bolyp er jetken qazaq halqy ejelden sportqa beıim. Óz jerimizde ótetin jarysqa tyńǵylyqty daıyndalyp, Qazaqstan quramasy sátti óner kórsetýi úshin sportshylarǵa barynsha jaqsy jaǵdaı jasaýymyz kerek. Óńirler dene shynyqtyrý jáne sport basqarmalary basshylaryn ulttyq sport túrlerin damytý boıynsha jumysyn jandandyrýdy suraımyn», - dedi Ermek Marjyqpaev. 

Aıta ketsek, elordadaǵy Alqa májilisinde mınıstr buqaralyq jáne olımpıadalyq sport túrlerin jetildirýde aýqymdy jumystar kútip turǵanyn aıtqan bolatyn. Sondaı-aq mınıstr sportshylardy daıarlaýdyń zamanaýı ınfraqurylymyn qurýdyń mańyzdylyǵyn atap ótken edi. 

Eske salaıyq, V Dúnıejúzilik kóshpendiler oıyny bıyl 8-14 qyrkúıek aralyǵynda Astana qalasynda ótedi.