«Óz úıim» baǵdarlamasy: 7 paıyzben úı alýǵa bolady

ASTANA. QazAqparat - Turǵyn úı qurylys jınaq bankiniń «Óz úıim» atty jeke baǵdarlamasyna qatysýshylar 2 shildeden bastap zaımdardy jyldyq 7% kólemindegi mólsherlememen ala alady. Bul týraly QazAqparat banktiń baspasóz qyzmetine silteme jasap habarlaıdy.

Budan bólek, bank salymshylarynda baspana alý múmkindigi burynǵydan da joǵary bolýy úshin eń tómengi bastapqy jarna kólemi de tómendetilip otyr.

2 shildeden bastap «Óz úıim» baǵdarlamasynyń aıasynda aldyn-ala turǵyn úı zaımyn alý úshin shotta úı baǵasynyń 20%-na teń somanyń basyn quraý jetkilikti bolmaq. Buǵan deıin «Óz úıim» baǵdarlamasynyń aıasyndaǵy nesıelerdiń paıyzdyq mólsherlemesi jınaq somasyna táýeldi edi. Shotynda úı qunynyń 30%-yn quraıtyn bastapqy jarnasy bar salymshy jyldyq mólsherlemesi 9,5% aldyn-ala zaımnan úmitker atanatyn. Al depozıtinde baspana baǵasynyń 50%-yn jınaǵan klıent 7,5-8,5% aralyǵyndaǵy mólsherlememen nesıe alýǵa quqyly bolatyn.

3,5-5% mólsherlememen beriletin turǵyn úı zaımdarynyń sharttary ózgergen joq. Mundaı nesıeni resimdeý úshin burynǵysha klıentke Turǵyn úı qurylys jınaq bankindegi shotyna úı qunynyń 50%-yn keminde 3 jyl ishinde jınap, qajet baǵalaý kórsetkishine qol jetkizý kerek.

Nesıelendirýdiń eń joǵarǵy merzimi - 25 jyl. Ol tańdalǵan zaım túrine baılanysty anyqtalady.

 «Óz úıim» baǵdarlamasyn Turǵyn úı qurylys jınaq banki 3 jyl buryn memlekettik baǵdarlamalarǵa qoldaý retinde iske qosqan edi. «Óz úıim» jobasy bank salymshylaryna qurylys salýshylar usynatyn jańa úılerdi naryqtaǵydan tómen baǵamen alýǵa múmkindik beredi. Almaty men Astanadaǵy 1 sharshy metrdiń ortasha quny - 260 000-290 000 teńge, al aımaqtarda 180 000-200 000 teńge. Bizdiń esepke sáıkes, Turǵyn úı qurylys jınaq bankinde shottaryna úı alýǵa qajet 20% kólemindegi bastapqy jarnany jınaǵan 45 000-daı salymshy bar. Biz qazir osy azamattarǵa qoljetimdi úı satyp alýǵa kómektesip, olardy jańa, jaıly jáne baǵasy tómen páterlerge ornalastyrýdy maqsat etip otyrmyz. Bul baǵdarlama aıasynda bank senim bildirip otyrǵan klıentterge ǵana emes, eldegi jalpy qurylys sektoryna qoldaý bildiredi, - dep túsindirip ótti Turǵyn úı qurylys jınaq banki basqarma tóraıymy Lázzat Ibragımova.

Osy jyly «Óz úıim» baǵdarlamasynyń aıasynda jalpy somasy 45,8 mlrd teńge bolatyn 3 885 páter satylady dep josparlanyp otyr. Onyń ishinde 623 páterdi bank salymshylary úleskerlik qurylys kezeńinde satyp alady.