Ózi tilinen tapqan shyǵar: Bıshimbaevty ustaǵan astanalyq polıtseıler jazalandy

<p>ASTANA. KAZINFORM — Azamattyq nekedegi áıelin óltirdi degen kúdikpen eks-sheneýnikti ustaǵan eki polıtsııa qyzmetkerine sógis jarııalandy.</p>

Qýandyq Bıshimbaevtyń isine qatysty sot otyrysy kezinde polıtseılerdiń kúdiktini ustaý sátiniń vıdeosy kórsetildi.

Onda polıtsııa qyzmetkeri Q. Bıshimbaevtan «ózi tilinen tapqan shyǵar?» (Áńgime Saltanat Núkenova týraly) dep suraıdy.

Bul fakt boıynsha qyzmettik tergeý bastalǵan edi.

Sonymen qatar oqıǵa ornynda bolǵan basqa qyzmetkerge de tekserý taǵaıyndaldy. 

Beınejazbadan onyń kúdiktimen birge kóshede temeki shegip, jerge túkirgenin baıqaýǵa bolady.

Búgin Іshki ister mınıstrligi eki tártip saqshysyna qatysty tergeýdiń aıaqtalǵanyn habarlady.

«Atalǵan fakti boıynsha Astana qalasynyń polıtsııa departamenti júrgizgen qyzmettik tergeý aıaqtaldy. Quqyq qorǵaý qyzmeti týraly zańnyń 19, 56-57-baptaryna sáıkes, sondaı-aq tártiptik komıssııanyń sheshimimen qyzmettik tártipti buzǵany úshin patrýldik polıtsııa polki qyzmetiniń ınspektoryna sógis jarııalandy» delingen habarlamada.

Odan bólek, QR Ákimshilik quqyqbuzýshylyq týraly kodekstiń 434-2-babynyń talaptaryn buzǵany úshin (jalpy paıdalaný oryndaryn lastaý) Astana qalasynyń polıtsııa departamenti Esil aýdanynyń jedel ýákiline qatań sógis jarııalanǵan.

Eske sala keteıik, Qýandyq Bıshimbaev 24 jylǵa sottaldy. 

Sondaı-aq, qoǵamda Bıshimbaev merziminen buryn bosap shyǵýy múmkin be suraq týyndaǵan edi.