Óz ómirimdi memlekettik tilge arnadym - Vıktorııa Kamaletdınova
Pavlodar oblysynyń Qazaqstan halqy Assambleıasynyń XV sessııasynda sóılegen «Jas Ekibas» jobasynyń avtory Vıktorııa Kamaletdınova ózin baqytty sezinetinin aıtty. - Kez kelgen zaıyrly memlekettiń áleýmettik jáne ekonomıkalyq damýy halyq birligi men kelisiminsiz múmkin emes, - deıdi Vıktorııa Kamaletdınova. - Qazekemniń «Baqyttyń kilti - eńbekte» degen tamasha sózi bar. Men ózimdi óte baqytty adammyn dep sanaımyn. Sebebi - ultym orys bolýyna qaramastan, maǵan qazaq tiliniń salasynda qyzmet etý, ony dáripteý hám nasıhattaý sáti tústi. Ómirimdi memlekettik tilge arnadym. Ekibastuzda 20 jyldaı boıy til salasynda eńbek etip kele jatqan lıngvıst soltústik, onyń ishinde Pavlodar oblysyna qatysty qalyptasqan stereotıpterge qarsy. - Baıqaǵanym, ózge óńirlerde turatyn otandastarymyzda «Pavlodar men Ekibastuz orystanǵan» degen burys pikir qalyptasqan, - dep aǵynan jaryldy Vıktorııa Kamaletdınova. - Men olarǵa «táýelsizdik jyldarynda ózge ult ókilderi, kerisinshe qazaqtanyp ketken joq pa» dep ázildeımin. Osy stereotıp namysyma tıip, sózdi qoıyp naqty iske kóshtim.
Vıktorııa Kamaletdınovanyń aıtýynsha, halyqty qazaq tiline baýlý úshin grammatıkany úıretýden góri, aýyzeki tilde sóılete bastaý kerek. - Grammatıkany qansha úıretseń de, halyq qazaqsha sóılep ketpeıtinin anyq ańǵarǵannan keıin kommýnıkatıvtik, sıtýatıvtik ádisti qoldanamyn. Jastar jyly aıasynda qarapaıym mamandyq ıelerin nasıhattaý jónindegi «Jas Ekibas» jobasyn júrgizýdi bastadym. Oǵan Ekibastuz ákimdiginiń qoldaý kórsetkeni úshin alǵys bildiremin.
Vıktorııa Kamaletdınovanyń eńbegin joǵary baǵalaǵan oblys ákimi Bolat Baqaýov Pavlodar jáne Ekibastuz qalalarynyń «Dostyq úıleri» negizinde «Sıtýatıvtik qazaq tili» jobasyn ázirleıtin avtorlyq ujymǵa enýge shaqyrdy.