Óz elimniń Týyn kótereıin dep atajurtqa oralyp edim - Esmıgýl Kýıýlova

<p>PARIJ. KAZINFORM &ndash; Frantsııa astanasy Parıj qalasynda ótip jatqan Olımpıada oıyndarynda búgin dzıýdodan áıelder arasynda synǵa túsken Esmıgýl Kýıýlova jarystan keıingi áserimen bólisti.</p>

«Bul meniń birinshi Olımpıadam bolǵannan keıin Parıjge joǵary kóńil-kúımen kelip edim. Bul qarsylasymdy utamyn dep oılaǵanmyn. Basynda upaı jiberip aldym. Ary qaraı utýǵa ýaqyt tarshylyq etti», — dedi Kýıýlova.

Soynmen qatar, Ózbekstannan elge oralǵandaǵy basty maqsatyn da aıtyp berdi.

«Dzıýdonyń álippesin Ózbekstanda úırendim. Ábıba Ábýjaqynova ekeýmiz de Ózbekstanda týdyq. Ol elge menen buryn ketti. Keıin maǵan „sen de kelip alsaıshy, Qazaqstan óz elimiz ǵoı» dedi. Araǵa birer jyl salyp Ábıbadan keıin men de elge oraldym. Atajurtqa kelýdegi basty maqsatym — ózbektiń týyn emes, qazaqtyń týyn kóterý. Ózbekstanda júre bergende Olımpıadany kórer me edim, kórmes pe edim, bilmeımin. Biraq, qazaq eliniń, ata qonysymynyń atynan kelgen alǵashqy Olımpıada oıynymda, alǵashqy beldesýimde utylyp qalǵanym ókinishti boldy. Endi alda, 3 tamyz kúni komandalyq saıysta tatamıge qaıta shyǵamyn», dedi sportshy.

Esterińizge sala keteıik, osyǵan deıin erler arasynda Abylaı Jubanazar da alǵashqy beldesýinde utylyp qalǵan bolatyn.