«Óz elimizde ózbekshe oqyp júr» - BAQ-qa sholý
***
«Qara altyn» dep qurmetteletin munaı quramyn túrli baǵytta paıdalaný - elimizdiń óndiris, qurylys salasyna qajetti ónimderdi ózimizde óndirý múmkindigin beredi. Ásirese, elge el qosylyp, jer-jerde jańa úıler men nysandar qurylystary boı kóterip, ındýstrııalyq alańǵa aınalǵan memleketimizde qurylys materıaldary ótimdi bolyp tur. Osy qajettilikti kórshiles elderdiń buıymdary bılep-tóstep barady. Esimizdi jıyp, birimiz beton, birimiz tsement, birimiz qubyr shyǵaryp qulshyna bastaǵanymyz qýantady. Bıyl osy qatarǵa munaıy mol Mańǵystaýdyń bıtýmy qosylatyn bolady. Bul jaıynda «Egemen Qazaqstan» gazetiniń búgingi sanyndaǵy «Bıtým surap basqaǵa barmaımyz» degen taqyryptaǵy maqalada baıandalǵan. Basylymnyń atap ótýinshe, Mańǵystaý oblysynda bıyl iske asatyn eń iri jobalardyń biri - «Caspi Bitum» birlesken kásiporny» JShS-da «Aqtaý plastıkalyq massa zaýytynda jol bıtýmdaryn óndirý» bolmaq. Bul óndiris orny jylyna 1 mln. tonnaǵa tarta munaı óńdeý jolymen jol bıtýmdaryn shyǵaryp, ázirge Mańǵystaý aımaǵyn jol qurylysy materıaldarymen qamtamasyz etetin bolady. Jalpy quny 43500 mln. teńgelik joba tolyq iske asyrylǵanda, tek qurylysta ǵana emes, gıdroızolıatsııalaý jumystarynda, alýan túrli mastıkter daıyndaýda qoldanylatyn bıtým shyǵaratyn jańa zaýyttan 325 adam jumys tabady.
«Premer-Mınıstrdiń birinshi orynbasary - Óńirlik damý mınıstri Baqytjan Saǵyntaevtyń qatysýymen elimizdiń Qorshaǵan ortany qorǵaý mınıstrliginiń 2012 jyldyń qorytyndylary jáne 2013 jylǵy mindetterine arnalǵan keńeıtilgen alqa májilisi ótti», - dep jazady «Egemen Qazaqstan» gazeti «Jasyl» ekonomıka - eldiń damý kórsetkishi» degen taqyryptaǵy maqalasynda. Jıyn barysynda vedomstvo basshysy: «Ótken jyly respýblıka boıynsha 1 mlrd. tonnadan astam qaldyq jınalǵan bolsa, onyń 244 mln. tonnasy kádege jaratyldy. Bul - josparlanǵan kólemnen 104 mln. tonnaǵa artyq», - depti. Onyń aıtýynsha, 2013 jyldyń 1 qańtarynan bastap jańasha basqarý quraly, Qaldyqtardy basqarý baǵdarlamasy engizilgen, bul baǵdarlama jınaqtalǵan jáne túziletin qaldyqtardy azaıtý boıynsha is-sharalar kózdeıtin bolady.
***
«Aıqyn» gazetiniń jazýynsha, Ońtústik Qazaqstan oblysy, Saıram aýdanynda 120 qazaq balasy ózbek mektebinde oqyp júr. Bul týraly basylymǵa Ońtústik Qazaqstan oblysy tilderdi damytý basqarmasynyń bastyǵy Balqııa Kómekbaeva habarlapty. Onyń aıtýynsha, ózbek mektebinen qazaq synyptaryn ashýǵa bolady. Tipti mektep salýdyń qajeti joq. Tek ózbek mektepteriniń ishinen qazaq synyptaryn ashsa bolǵany. Al Saıram aýdanynyń ákimdiginiń ókilderi bes-alty balaǵa bola qazaq synyptaryn ashýdyń qajeti joq degen oıda eken. Sebebi olar oblystyq til basqarmasy bastyǵynyń aıtyp otyrǵan 120 balanyń qazaq ekendigine kúmán keltirip otyr. Aqparat «Óz elimizde ózbekshe oqyp júr» degen taqyryppnen berilgen.
«Qazaqstanda, tek ótken jyl ishinde ǵana «tabıǵı monopolııalarǵa» 240,9 mıllıard teńge qarjy quıylypty! Osylaısha, jylý, jaryq, sý jáne basqa da sala alpaýyttarynyń byltyr «jutqan» qarjysynyń aýqymy taǵy 68 paıyzǵa artqan: 2011 jyly qazaqstandyq tabıǵı monopolııa nysandaryna álgi somadan 98 mlrd-qa kem qarajat ketken bolatyn», dep jazady «Aıqyn» gazeti «Tutynýshyny tonaý tyıylmaı tur» degen taqyryptaǵy maqalasynda. Basylymnyń atap ótýinshe, óz tutynýshylaryna balama usynbaıtyn, ózinen basqa básekelesi joq bul alpaýyttardyń barǵan saıyn arany ashylýda. Olardy ustap turý úshin qomaqty ınvestıtsııany memleket te quıýda, ekinshi jaǵynan tipti aı saıyn qymbattap jatqan aqysyn qazaqstandyqtar qyńq etpeı, tóleýde.
***
«Petropavldyń halyqaralyq áýejaıy bir jylǵa jabyldy», - dep jazady «Ekspress K» gazeti. «Petropavldyń halyqaralyq áýejaıy jýrnalıster úshin taýsylmas sensatsııa kózine aınaldy. Olardyń eń sońǵylarynyń biri: Soltústik Qazaqstan oblystyq ekononomıkalyq sotynyń sheshimimen atalǵan áýe gavanynyń qyzmeti bir jylǵa toqtatylǵan», - delingen maqalada. Tolyǵyraq «Samolety ýmıraıýt na zemle» degen taqyryptan bile alasyzdar.
***
«Kazahstanskaıa pravda» gazetiniń jazýynsha, taldyqorǵandyqtarǵa biregeı múmkindik týyp otyr. Taldyqorǵandaǵy Dostyq úıinde oblystyq QR Halyq assambleıasy men Seýldiń «Anseı» mamandandyrylǵan aýrýhanasy arasynda yntymaqtastyq týraly memorandýmǵa qol qoıylǵan. Atalǵan qujatqa sáıkes sheteldik dárigerler qazaqstandyqtardy tegin medıtsınalyq tekserýden ótkizip, dıagnoz qoımaq. Hırýrgııalyq ota jasaý qajet asa aýyr aýrý túri bilingende naýqas Ońtústik Koreıa astanasyna jiberiledi.