Óz basym jeńildim dep oılamaımyn - Sáken Bıbosynov

NUR-SULTAN. QazAqparat – Qazaqstandyq boksshy, Tokıo Olımpıadasy oıyndarynyń qola júlde ıegeri Sáken Bıbosynov jekpe-jekten keıingi óz oıymen bólisti, dep habarlaıdy QazAqparat tilshisi.

«Jekpe-jektiń birinshi raýndynda nokaýt bolmady, ekinshi raýndta men bar kúshimdi salǵandyqtan, qarsylasymnan basym tústim dep oılaımyn. Óz basym jeńildim dep oılamaımyn, degenmen tóreshiniń sheshimi solaı. Jáne bul kórsetkishpen toqtamaımyn, alda jiberilgen kemshilikter boıynsha jumys istep, odan ári jarysqa qatysyp, jeńiske jetemin», - dedi S. Bıbosynov OKQ-de onlaın ótken baspasóz máslıhatynda.

Sondaı-aq, boksshynyń jekpe-jegine qatysty QR Mádenıet jáne sport mınıstrligi Sport jáne dene shynyqtyrý isteri komıtetiniń tóraǵasy Serik Sápıev te pikirin bildirdi.

«Búgingi jartylaı fınalda men Bıbosynov jeńdi dep bilemin. Birinshi raýndta soqqyny jiberip alǵandyqtan, tóreshilerdiń bári birdeı upaıdy Sákenniń qarsylasy bolǵan aǵylshyn boksshysyna berdi. Al ekinshi raýndta 2:3 esebimen bizdiń sportshy basym tústi. Úshinshi raýndta tóreshi 3:2 upaımen jeńisti Bıbosynovqa berdi. Tóreshiler ádil baǵa berdi me, jaýapty solardyń ar-uıatyna qaldyrdyq, jeke meniń oıym – Sáken jeńdi. Onyń «altyn» alý múmkindigi bar edi», - dedi S. Sápıev.

Aıta keteıik, Tokıo Olımpıadasynda qazaqstandyq boksshy Sáken Bıbosynov (52 keli) qola júldeger atandy.

Foto: olympic.kz