Óz áreketimdi erlik dep eseptemeımin – eki adamdy órtten qutqarǵan serjant

ORAL. QazAqparat – Men óz áreketimdi erlik dep eseptemeımin. Meniń ornymda basqa bireý bolsa, ol da sondaı qadamǵa barar edi. Bul týraly BQO boıynsha qylmystyq-atqarý júıesi departamentine qarasty RÝ-170/1 mekemesiniń baqylaýshysy, ádilet serjanty Abylaı Tóleev málim etti, dep habarlaıdy QazAqparat tilshisi.

Abylaı Merlanuly 1998 jyly Jánibek aýdany Tegisshil aýylynda dúnıege kelgen.

Mektepti 2016 jyly bitirgen. 2018 jyly óz erkimen suranyp, Shymkent qalasynda QR Ulttyq ulany «Ońtústik» óńirlik qolbasshylyǵyna qarasty 6506-áskerı bóliminde azamattyq boryshyn ótep qaıtqan.

2019 jyldan beri RÝ-170/1 mekemesinde baqylaýshy retinde óz qyzmetin jaýapkershilikpen atqaryp keledi.

-Abylaı, ótken qysta órt kezinde eki adamdy qutqaryp qaldyń, ol oqıǵa qalaı bolyp edi?

-Iá, 21 qańtar kúni túngi saǵat 01.00 shamasynda serýendep júr edim. Muhıt kóshesindegi úıdiń 5-qabatynan órt shyqqanyn kórip, bir jas jigit kelip, kómektesýimdi ótindi. Júgirip baryp, besinshi qabatqa kóterildim. Aldymen dálizdegi adamdardyń bárin syrtqa shyǵardym. Janyp jatqan páter esigin ashaıyn dep edim, ystyq eken, ustatpady. Sosyn 4-qabattan tereze arqyly kirýge talpyndym, biraq órttiń qyzýy sonshalyqty, jaqyndatpady. Bolmaǵan soń, kórshilerdiń kómegimen temir esikti syndyryp ashtym, úıdiń ishi kórinbeıdi, qoıý tútinniń ısi de shydatpaıdy. Ústime eki shelek sýdy quıyp jiberip, páterge qabyrǵany jaǵalap kirip, eki adamdy alyp shyqtym. Sodan keıin órt sóndirýshiler de keldi ǵoı. Ózim de gazdan ýlanyp, bes kún aýrýhanada jattym.

-Osy batyl áreketińdi erlik dep esepteısiń be?

-Erlik deýge kelmes. Bul kim-kimniń de qolynan keledi. Qalypty jaǵdaı dep oılaımyn. Eger kóz aldyńda bireýdiń ómiri qyl ústinde tursa, ózińdi oılap tastap ketip qala almaısyń.

-Óz otbasyń týraly aıta ketseń?

-Úıde alty balamyz. Aǵam Sáken osy Oraldaǵy Ulttyq ulannyń «Batys» óńirlik qolbasshylyǵyna qarasty 5517-áskerı bóliminde qyzmet etedi. Odan keıingi aǵam Órkenniń ómiri qysqa bolyp, 2015 jyly qaıtty. Ákem Merlan da 1999 jyly 26 jasynda dúnıeden ozdy. Sol kezde men bir jasta bolsam, qaryndasym Danagúl anam Ádeminiń qursaǵynda qalǵan edi, qazir turmysta. Sodan soń bes jasar Inabat Qaıratqyzy men úsh jasar Tóráli degen kishkentaı ini-qaryndasym bar.

-Bolashaqtaǵy arman-maqsatyń qandaı?

-«General bolýdy armandamaǵan soldat soldat emes» degen sóz bar, men de sardar atanyp, qyzmettiń eń bıik shyńyn baǵyndyrǵym keledi.

Eske sala keteıik, budan buryn Oralda tergeý ızolıatory qyzmetkeriniń eki adamdy órtten qutqarǵanyn jazǵan bolatynbyz.