«Oıyny osylǵan olıgarh» - respýblıkalyq basylymdarǵa sholý
***
«Keshe Londonnyń Joǵary soty BTA banktiń burynǵy basshysy Muhtar Ábilázovti sotty qurmettemegeni úshin qamaýǵa alý týraly qaýly shyǵardy. Bul jóninde sýdıa Naıdjel Tıerdiń sheshiminde aıtylǵan. Sýdıa Ábilázov tómende keltirilgen aıyptaýlar boıynsha sotty qurmettemegeni úshin kináli degen sheshim shyǵardy», dep jazady «Egemen Qazaqstan» gazeti «Oıyny osylǵan olıgarh» degen taqyryptaǵy maqalasynda. Basylymnyń atap ótýinshe, Ábilázov qarjy aktıvteri men qundy qaǵazdar elden shyǵarylǵan «Býbrıs» kompanııasynyń qojaıyny bolyp tabylatynyn jasyrǵan. Sol sııaqty Londonnyń Joǵary sotynan Anglııadaǵy jyljymaıtyn múliktiń qojaıyny bolyp tabylatynyn da búgip qalǵan Ábilázov sotqa qatysqan joq. Osyndaı aıyptaýlarǵa baılanysty sot Ábilázovti ustap, 22 aı merzimge qamaýǵa alý jóninde sheshim shyǵardy.
«Egemen Qazaqstan» gazetiniń jazýynsha, keshe Qazaqstan Respýblıkasy Parlamenti Májilisiniń Tóraǵasy Nurlan Nyǵmatýlın Amerıka Qurama Shtattarynyń Qazaqstan Respýblıkasyndaǵy Tótenshe jáne ókiletti elshisi Kennet Feırfakspen kezdesti. Kezdesý barysynda taraptar Qazaqstan men AQSh yntymaqtastyǵynyń eń basty máseleleri tóńireginde pikir almasty. Qazaqstan men Amerıkanyń qarym-qatynasy strategııalyq áriptestik jaǵdaıynda damyp kele jatqany atap ótildi. Suhbattasýshylar qaýipsizdik taqyrybyna arnaıy toqtaldy. Osy oraıda Nurlan Nyǵmatýlın Qazaqstan Prezıdenti Nursultan Nazarbaevtyń ıadrolyq qaýipsizdik jónindegi, sondaı-aq Jalpyǵa ortaq ıadrolyq qarýsyz álem deklaratsııasyn qabyldaý týraly bastamalarynyń mańyzdylyǵyn atap ótti.
***
Jańartylatyn energııa kózderin qoldaýǵa arnalǵan zań elimizde 2009 jyly qabyldanǵan bolatyn. Zańnamalyq qoldaý bolǵanymen, eki jylda balama qýat beretin nysandar qatary qaptap, sarqylmaıtyn energııa nysandarynyń saqaıyp ketpegeni belgili. Sondyqtan jańartylatyn energııaǵa qatysty álemdik tájirıbelerdi saraptap, balama kózderdi damytýǵa ne kedergi ekenin zerdelegen Indýstrııa jáne jańa tehnologııalar mınıstrligi qýattyń osy túrin qoldaýǵa arnalǵan jańa zań jobasyn ázirlepti. Keshe bul qujatyń tusaýy Májiliste kesildi. Bul jaıynda «Alash aınasy» gazetiniń búgingi sanyndaǵy «Balama energııa kózine balama zań kerek» degen maqaladan egjeı-tegjeıli bile alasyzdar.
2007 jyldyń 1 qańtarynan bastap elimizdegi demokratııalyq damý men sot bıligi júıesin nyǵaıtý maqsatynda sot májilisteri alqabılerdiń qatysýymen ótkizile bastady. Qarapaıym halyq ókilderi bolyp tabylatyn alqabılerdiń sot sheshimderine qatysýyna, jaı ǵana qatysyp qoımaı, sot otyrysynda sheshim shyǵarýǵa naqty yqpal etýine jaǵdaı jasaıtyn bul ózgeris demokratııalyq qoǵam qurý talaptarynan týyndaǵany anyq. Áıtse de adam taǵdyryn sheshýge atsalysyp júrgen alqabılerdiń sapalyq deńgeıi qanshalyqty? Muny teksergen prokýratýra organdary shoshyp otyr. Prokýrorlardyń júrgizgen tekserýi nátıjesinde Almaty qalasy boıynsha alqabıler quramynan 1066 azamat alynyp tastalǵan. Óıtkeni bul tizimdegilerdiń 574-i buryn sottalǵan bolsa, 84-i júıke aýrýyna shaldyqqan, al 335-i nashaqor, 40 azamat memlekettik qyzmetker, 117 adam shet memlekettiń ókili bolyp shyqqan. Bul másele týraly «Alash aınasy» gazetindegi «Aqyl-esi kúmándi alqabıler» degen maqaladan oqı alasyzdar.
***
«Keshe Prezıdent Ákimshiligi Basshysynyń orynbasary T.Donaqovtyń tóraǵalyǵymen Qazaqstan Respýblıkasy Joǵary Sot Keńesiniń kezekti otyrysy ótti. Otyrysta Respýblıkanyń keıbir aýdandyq jáne oǵan teńestirilgen sottardyń sýdıalarynyń shtat sanyn qaıta bólý jónindegi Joǵarǵy Sottyń usynystary qarastyryldy», - dep jazady «Kazahstanskaıa pravda» gazeti. Basylymnyń atap ótýinshe, jıynda sot júıesindegi birqatar kadrlyq, onyń ishinde jańadan qurylǵan kámeletke tolmaǵandardyń isteri jónindegi mamandandyrylǵan aýdanaralyq sottardyń tóraǵalary qyzmetterine kandıdatýralar, sondaı-aq respýblıkanyń keıbir sottarynyń sýdıalaryn qyzmetterinen bosatý jónindegi usynystar týraly máseleler qarastyryldy.