Oıynshyq tapanshamen qorqytqan: Er adam oıyn klýbynan 4 mln teńge alyp ketken

QARAǴANDY. QazAqparat - Qaraǵandy oblysynda qaraqshy kompıýter klýbyna oıynshyq tapanshamen kirip, tonap ketken, dep habarlaıdy QazAqparat Polisia.kz saıtyna silteme jasap.

«30 qyrkúıek kúni saǵat 12.00 shamasynda Qaraǵandy qalalyq polıtsııa basqarmasynyń Jedel basqarý ortalyǵyna qaladaǵy oıyn klýbtarynyń birine qaraqshylyq shabýyl jasalǵany týraly habarlama tústi. Oqıǵa ornyna birden jedel-tergeý toby jiberildi. Polıtseılerge klýbtyń qyzmetkeri únemi osy mekemede oıyn oınap júrgen klıenttiń biri kenetten tapanshaǵa uqsas zatpen qorqytyp, aqsha talap etkenin túsindirdi.
Kúdikti kassadaǵy 3,9 mln teńgeni qoldy qylyp, oqıǵa ornynan izin sýytqan. 34 jastaǵy kúdikti azamat anyqtaldy», - delingen polıtsııa málimetinde.

Kúdikti sol mekemedegi oıyn barysynda qomaqty qarjysynan utylyp qalyp, sońynda osyndaı áreketke barǵanyn aıtqan.

«Ol oıynshyq tapansha satyp alǵan. Kúdiktiden aıǵaq zat tárkilendi. Atalǵan fakti boıynsha Qazaqstan Respýblıkasy Qylmystyq kodeksiniń 192-babyna (Qaraqshylyq) sáıkes, qylmystyq is qozǵaldy. Kúdikti ýaqytsha ustaý ızolıatoryna qamaldy. Tergeý amaldary júrgizilip jatyr», - delingen habarlamada.

Vıdeodan alynǵan kadr