Oıyn avtomattary zaldaryna kredıt kartalary arqyly tólemder jasaýǵa tyıym salynýy múmkin
«Jastardyń qumar oıyndary men esirtkige táýeldiliktiń qurbany bolatyn jaǵdaılary az emes. Sondyqtan búginde jastardy osy zııandy dertterden qorǵaý máselesi kún tártibinde tur. Búginde ýákiletti organdar zańnamada belgilengen tártippen tyıym salynǵan ınternet-kazınolardy anyqtap, buǵattaý jumystaryn júrgizip jatyr. Jyl basynan beri ınternet-kazıno qyzmetiniń 350-den asa faktisi anyqtaldy», - dedi E. Toǵjanov.
Onyń aıtýynsha, onlaın-kazınoǵa qarsy kúres baǵytynda zańnamalyq túzetýler jobasy ázirlenip jatyr.
«Atap aıtqanda, ınternet-kazıno uıymdastyrýshylary tizbesin júrgizý, kazınolarǵa ári oıyn avtomattary zaldaryna kredıt kartalary arqyly tólemder jasaýǵa tyıym salý, sondaı-aq adamdarda kredıt tarıhy nashar bolsa, olardan stavka qabyldaýǵa tyıym salý qarastyrylyp otyr. Internet-kazıno uıymdastyrǵany úshin qylmystyq jaýapkershilikti engizý máselelerin eskerip otyrmyz», - dedi Úkimet basshysynyń orynbasary.
Sonymen qatar, ol jastar arasynda esirtki zattarynyń taralýyna qarsy jáne nashaqorlyqtyń aldyn alý boıynsha naqty sharalar qabyldanyp jatqanyn da jetkizdi. Jyl basynan beri quqyq qorǵaý organdary 1000-nan asa esirtki qylmystaryn anyqtaǵan, onyń 734-i esirtkini taratýǵa qatysty.
«Budan bólek, myńǵa jýyq esirtki zattaryn satýmen aınalysqan ınternet-magazınderdiń joly kesildi», - dedi E.Toǵjanov.
Budan buryn habarlanǵandaı, Senat tóraǵasy Máýlen Áshimbaev barlyq reformanyń túpki maqsaty jastardyń ál-aýqatyn arttyrýǵa ári olardyń damýyna jaǵdaı jasaýǵa arnalǵanyn atap ótti.
Sonymen qatar ol ýnıversıtet bitirgen túlekterge eńbek naryǵynda suranys joq ekenin aıtty.
Senator Nurtóre Júsip eldegi JOO men kolledjderdi bitirgen, qoldarynda bir emes, birneshe dıplomy bar jastar eńbek naryǵynyń suranysyn qanaǵattandyra almaı otyrǵanyn málimdedi.