Oıyl aýdanynda jastar turǵyndardy óz kóligimen tegin tasymaldady

OIYL. QazAqparat – Aqtóbe oblysy, Oıyl aýdanyndaǵy aýyl sharýashylyǵy kolledjiniń stýdentteri aýyldastaryn kólikpen tegin tasymaldady, dep habarlaıdy QazAqparat tilshisi.

Táýelsizdiktiń 30 jyldyǵyna oraı Oıyl agrarlyq kolledjiniń stýdentteri «30 ıgi is» aktsııasyn qoldady. Jastar jeke kóligimen aýyl ishinde adamdardy tegin tasydy.

«Aýyl turǵyndary óz alǵysyn bildirip, jastardy qoldaıtynyn aıtty. Bul qaıyrymdylyq sharasy aldaǵy ýaqytta óz jalǵasyn tabady. Ardagerlerdi de nazardan tys qaldyrmaımyz. Jalǵyzbasty qarııalardyń úıin jınap, qaryn tazartyp beremiz», - dedi «Jas Otan» jastar qanatynyń tóraǵasy, aýdandyq jastar resýstyq ortalyǵynyń basshysy Meırambek Mýzameluly.

Oıyl aýdanynyń jastary Qaraoı aýylyndaǵy zamandastaryna estafeta joldady. Olar tańerteń balalardy balabaqshaǵa tasydy. Qaraoı jastary bolsa Sarbıe aýylyndaǵy zamandastaryn aktsııany qoldaýǵa shaqyrdy. Aıta keteıik, aýdandaǵy ıgi is ár aýyldy qamtıdy.