Oıran salý, arandatý - musylmanǵa tán áreket emes - QMDB tóraǵasynyń orynbasary

NUR-SULTAN. QazAqparat – Qazaqstan musylmandary dinı basqarmasy tóraǵasynyń orynbasary, naıb múftı Ershat Ońǵar eldegi ahýalǵa qatysty óz oıyn aıtty, dep habarlaıdy QazAqparat tilshisi.

«Árıne, aldymen Alladan el tynyshtyǵy úshin duǵa tileımiz. Dál qazir biz úshin mańyzdysy eldiń aýyzbirshiligin saqtaý. El amandyǵyn tilep, alaýyzdyqqa jol bermeý. Jańa ǵana Memleket basshysynyń halyqqa úndeýin tyńdadym, Qazaqstan musylmandary dinı basqarmasy el qamy úshin qabyldaǵan Prezıdent sheshimin tolyq qoldaıdy. Qasym-Jomart Toqaev el erteńine qatysty túıtkildi jaıttar men ony sheshý joldaryna toqtalyp ótti. Ózderińiz biletindeı, qaýipsizdikti saqtaý maqsatynda tótenshe jaǵdaı kezinde meshitter de jamaǵat bolyp namaz oqýǵa, basqa da dinı shara uıymdastyrý ýaqytsha toqtatyldy. Osy oraıda jurtshylyq jaǵdaıǵa túsinistikpen qarasa eken deımin. Óıtkeni, tótenshe jaǵdaı erejesine baǵyný mańyzdy», - dedi Ershat Ońǵar.

Onyń aıtýynsha, Qazaqstan musylmandary dinı birlestigi elde búliktiń bolýyn qoldamaıdy jáne halyqty sabyrǵa shaqyrady.

«Qurandaǵy Bahara súresiniń 191 aıatynda «búlik shyǵarý kisi óltirýden de aýyr kúná», - delingen. Eldegi bolyp jatqan jaıt, órkenıetti Qazaqstannyń demokratııalyq qaǵıdatyna kereǵar jáne oıran salý, arandatýshylyqqa alyp barý musylmanǵa tán emes áreket. Bizdiń basqarma lańkester men sodyrlardyń teris áreketin aıyptaıdy. Paıǵambarymyz aıtqandaı, naǵyz musylman ózge musylmanǵa qolmen de, tilmen de zııan keltirmeıdi. Zııan keltirý, el ishinde búlik shyǵarý aýyr kúná ekenin taǵy eske salǵym keledi», - deıdi ol.

Aıta ketsek, búgin Memleket basshysy Qazaqstan halqyna úndeý joldady.