«Oıdan iske asyrýǵa deıin bir-aq qadam» atty halyqaralyq konkýrs márege jetti
dep habarlaıdy QazAqparat.
Atalǵan konkýrstyń maqsaty saqtandyrý jáne táýekeldi basqarý salasynda úzdik ınnovatsııalyq ıdeıalardy jaryqqa shyǵarý. Bıyl 5-shi ret ótkizilip otyrǵan konkýrsqa 12 memleketten 500-ge jýyq jumys kelip túsken. Qazaqstan joǵary oqý oryndary qaýymdastyǵy, Almaty qalasy jastar saıasatyn damytý memlekettik qory, BAQ ókilderine quralǵan qazylar alqasy bulardyń ishinen 6 jumysty tańdap, úzdik dep tanyǵan. Konkýrs qorytyndysy boıynsha S.Toraıǵyrov atyndaǵy Pavlodar memleketik ýnıversıtetiniń stýdenti Irına Merkýshova bas júldege ıe bolyp, oǵan 75 myń teńge júlde berildi. «Saqtandyrý bıznesindegi «haı-tek» atalymynda «Turan» ýnıversıtetiniń stýdenti Alekseı Nıgaı, «Saqtandyrý oıyn óneri» atalymy boıynsha Ál-Farabı atyndaǵy QazUÝ-dyń stýdentteri Álıaıym Dúısenbekqyzy, Ázıza Qusaıynova, Indıra Múmınova, «Saqtandyrý álemine ashylǵan tereze» atalymy boıynsha Kıev ulttyq sýda-ekonomıkalyq ýnıversıtetiniń stýdenti Bogdan Lysak 25 myń teńge kóleminde syılyqqa ıe boldy. Sonymen qatar jeńimpazdardyń jetekshileri Ámına Chıvazova, Nurlan Ahmetov, Maııa Pirálıeva, Raýshan Bekovalar da «Evrazııa» saqtandyrý kompanııasynyń baǵaly syılyqtaryna ıe boldy.
Saqtandyrý kompanııasynyń atqarýshy dırektory Qýanysh Dáýitovtyń aıtýynsha, konkýrs aldaǵy ýaqytta da jalǵasyn tabatyn bolady. «Konkýrs osyǵan deıin respýblıkalyq deńgeıde bolsa, bıyl Eýrazııa qurlyǵy aýmaǵynyń stýdentterine de qatysýǵa múmkindik berildi. Kelesi jyly deńgeıin budan da joǵary kóterýdi oılastyryp otyrmyz», deıdi Qýanysh Dáýitov.