Ovchınnıkova Londondaǵy álem chempıonatynda el namysyn qorǵaıdy

ASTANA. QazAqparat - Úndistanda ótken Azııa chempıonatynda úsh qarǵyp sekirýden jeńiske jetken 18 jastaǵy qaraǵandylyq Marııa Ovchınnıkova Londonda tamyz aıynda ótetin álem chempıonatyna qatysady, dep habarlaıdy «QazAqparat» HAA tilshisi.

Marııa Ovchınnıkova Azııa chempıonatynda úsh qarǵyp sekirýden 13,72 santımetr uzyndyqqa sekirip, qurlyq chempıony atanǵan bolatyn. Bul jetistiktiń arqasynda jas sportshy Londonda ótetin álem chempıonatyna joldama alyp otyr. Qazirgi kezde mamandar jas sportshynyń bolashaǵynan úlken úmit kútedi. Aıta keterligi, Londondaǵy álem chempıonatynda Olımpıada oıyndarynyń jeńimpazy Olga Rypakova da qatysady.

«Azııa chempıonatynda básekelestik óte joǵary boldy. Degenmen Irına Ektova ekeýimiz altyn men kúmisti ózara bólisip alǵanymyzǵa qýanyshtymyn. Úsh qarǵyp sekirýden ózimniń jeke rekordym - 13, 94 santımetr. Endi alda Londonda ótetin álem chempıonaty bar. Álemniń myqtylary bas qosatyn dodada qolymnan kelgendi aıanyp qalmaımyn, - deıdi Marııa Ovchınnıkova.

Úsh qarǵyp sekirýden qazaqstandyq atletterge Kolýmbııa men Bahreın eliniń sportshylary negizgi básekelester bolmaq.

Eske sala ketsek, búgin Astanada QR Jeńil atletıka federatsııasynyń prezıdenti Ádilbek Jaqsybekov pen QR Mádenıet jáne sport mınıstri Arystanbek Muhamedıuly jeńil atletıkadan Úndistanda ótken Azııa chempıonatynyń jeńimpazdaryn marapattaǵan bolatyn. Azııa chempıonatynan 4 altyn, 3 kúmis, 2 qola ákelgen qazaqstandyq jeńil atletterge aqshalaı syıaqy tabystaldy.