Otyrarlyq turǵyn týǵan jerine sport keshenin salyp berdi

ASTANA. QazAqparat - Elbasymyz Nursultan Nazarbaevtyń «Bolashaqqa baǵdar: rýhanı jańǵyrý» atty maqalasynda kóterilgen «Týǵan jer» baǵdarlamasyn iske asyrý maqsatynda týǵan elden túlep ushyp, elimizdiń basqa oblys, qalalarynda qyzmet atqaryp júrgen azamattar kishi Otanǵa degen yqylastaryn bildirip jatyr, dep habarlaıdy oblystyq ákimdiktiń baspasóz qyzmeti.

Týǵan jerge degen tartýlardyń birin elordamyz Astana qalasynyń 20 jyldyq mereıtoıy aıasynda jáne qasıetti Ramazan aıynda jeke kásipker Esbol Qambarov Aqtóbe aýylynda zamanaýı talapqa saı 240 oryndyq Áýesbek Qambarov atyndaǵy sport  keshenin paıdalanýǵa berdi.

Aýdan ákimdiginiń usynysyn qabyl alǵan jeke kásipker Esbol Áýesbekuly 1 naýryz - Alǵys aıtý kúni merekesine oraı qurylys jumystaryn bastap, bolashaq sport kesheniniń qazyǵyn qaǵý rásimin ótkizgen bolatyn. Mine, araǵa az ǵana ýaqyt salyp, jeke kásipker demeýshiligimen salynyp, aýyldyń ajaryna sán qosqan keshen qurylysy tolyǵymen aıaqtalyp, aqtóbelikterdi zor qýanyshqa keneltti.

Bolashaqta osy keshende shyńdalǵan balǵyn sportshylarymyz halyqaralyq deńgeıdegi jarystarda top jaryp, Olımp shyńyn baǵyndyratyndyǵyna senim bildirdi aýyl turǵyndary.

Aýyl turǵyndarynyń alǵysyna bólengen jomart azamatqa el aǵalary qurmetpen at mingizip, ıyǵyna shapan japty.

Endigi jerde aýyl turǵyndary sporttyń kúres, boks, kishi fýtbol, volleıbol, basketbol, ústel tennısi sekildi birneshe túrimen shuǵyldanyp, buqaralyq sportty damytýǵa óz úlesterin qosatyn bolady.

Sport kesheniniń ashylý rásiminen soń tyl ardageri Áýesbek Qambarulyn eske alýǵa arnalǵan volleıboldan oblystyq birinshilikpen jalǵasyn tapty.

Turǵyndar arasynda buqaralyq sportty damytý, salaýatty ómir saltyn nasıhattaý maqsatynda ótip jatqan týrnırge oblysymyzdan 10 komanda qatysyp, baqtaryn synady.