«Otyrardy qorǵaý» anımatsııalyq fılmi kórermenge jol tartty

ShYMKENT. QazAqparat  - Ońtústik Qazaqstan oblysynda «Otyrardy qorǵaý» atty anımatsııalyq fılm kórermenge jol tartty. Tusaýy kesilgen týyndy Elbasynyń «Bolashaqqa baǵdar: rýhanı jańǵyrý» maqalasy aıasynda oblys ákimi Janseıit Túımebaevtyń ıdeıasymen daıyndalǵan, dep habarlaıdy  QazAqparat tilshisi.

Qazaq halqynyń tarıhynan syr shertetin shyǵarmanyń saltanatty tusaý keser rásimine oblys ákimi, zııaly qaýym ókilderi men turǵyndar qatysty. Jıynda sóz alǵan aımaq basshysy fılmdi daıyndaýdaǵy maqsatyna toqtaldy.

«Memleket basshysy «mádenı qazynalarymyzdy álem jurtshylyǵyna tanystyrýdyń múldem jańa tásilderin oılastyrý kerek. Mádenı ónimderimiz tek kitap túrinde emes, ártúrli mýltımedııalyq tásildermen de shyqqany abzal» degen bolatyn. Bul tapsyrma óńirimizde tıisti deńgeıde atqarylyp keledi. Mine, «Otyrardy qorǵaý» anımatsııalyq fılmi osynyń dáleli», - dedi Janseıit Túımebaev.

2D, 3D formatynda jasalǵan týyndy óńirdegi týrızm salasyn damytý men Otyrar tóbeniń mártebesin kóterýge, shetel azamattarynyń qyzyǵýshylyǵyn arttyrýǵa jáne kóneden kele jatqan ańyz-áńgimelerdi nasıhattaýǵa, sondaı-aq kórermenderdi patrıotızmge baýlýǵa baǵyttalǵan.

Anımatsııalyq fılmde aty ańyzǵa aınalǵan kóne Otyrar qalasynyń turmys-tirshiligi men mádenıeti elin súıetin eki balanyń bastan keshken hıkaıalary arqyly sýretteledi. Shyǵarmany tamashalaǵan kórermen álemdegi ekinshi kitaphana atanǵan Otyrar kitaphanasy men Ábý Nasyr ál-Farabı týraly tolyq maǵlumattarǵa qanyǵady. Sondaı-aq jaýdy kúshpen ǵana emes, aqylmen de jeńýge bolatynyn túsingen balalardyń erligi baıandalady.

Anımatsııalyq fılmniń rejısseri ári bas sýretshisi - Azamat Ernazarov, stsenarıı avtory - Baqytjan Quljabaı, mýzykasyn jazǵan - Rýslan Shynyqulov, fılmniń dırektory - Nurıddın Patteev.

25 mınýttyq anımatsııalyq fılmniń alǵashqy kórsetiliminen keıin, oblys ákimi jobaǵa atsalysqan azamattarǵa rızashylyǵyn bildirip, olardy alǵys hattarmen marapattady.

Aıta keteıik, bul Elbasynyń «Bolashaqqa baǵdar: rýhanı jańǵyrý» baǵdarlamalyq maqalasyn júzege asyrý maqsatynda oblys ákiminiń  tapsyrysymen túsirilgen jalǵyz fılm emes. «SAQ» kınostýdııasy buǵan deıin «Kúsh atasy - Qajymuqan», «Kıeli Qazyǵurt» mýltfılmderin jáne «Kóne jetigenniń syry» atty 10 serııaly telehıkaıany daıyndaǵan bolatyn.

Budan bólek, 2018 jyly Ońtústik Qazaqstan oblysy ákimdiginiń qoldaýymen «Tóle bı» 10 serıaly kınohıkaıasyn, «Túrkistan», «Oqsyz oqıǵasy», «Ordabasy - birliktiń týy» atty anımatsııalyq fılmderin túsirý josparlanýda.