Otyrarda jastardyń «Altybaqan» saýyq keshi ótti

ShYMKENT. QazAqparat - Ońtústik Qazaqstan oblysynda jastardyń «Altybaqan» saýyq keshi ótti.  Elbasynyń baǵdarlamalyq maqalasyn júzege asyrý men ulttyq qundylyqtardy nasıhattaý maqsatynda uıymdastyrylǵan sharaǵa aýyl jastary qatysyp, án men jyrdan shashý shashty, dep habarlaıdy QazAqparat HAA tilshisi.

Oblystyq salt-dástúr jáne ádet-ǵuryptardy oqytý ortalyǵy men Otyrar aýdany ákimdigi uıymdastyrylǵan shara Elbasy N. Nazarbaevtyń «Bolashaqqa baǵdar: rýhanı jańǵyrý» maqalasy aıasynda ótti. Aýyl-aımaqtan jınalǵan ónerpazdar dástúrli ánderdi naqyshyna keltire shyrqap, jastar «Soqyr teke», «Júzik salý», «Tobyq», «Qoshqar kóterý», «Aq súıek» sekildi qazaq halqynyń ulttyq oıyndaryn oınady.
 

Qonaqtar altybaqan aıasynda ásem án men syńǵyrlaǵan kúlkige toly saýyq keshti tamashalady.  Saýyq keshke qatysqan jastar bolsa «Altybaqan» rýhanı qýat, ónegeli tárbıe beretinine senimdi. 
 

Keshte aýdan ákimi Erlan Aıtahanov sóz sóılep, ıgi sharanyń mańyzyna toqtalyp ketti. Sondaı-aq, aldaǵy ýaqytta da óz jalǵasyn tabatynyn jetkizdi.  Qatysýshylarǵa otyrarlyqtardyń kádesyıyn tartý etti.
 

Kesh sońynda Qazaqstannyń halyq aqyny Áselhan Qalybekova tamasha keshten alǵan áserimen bólisip, jastar ónerine alǵysyn bildirdi.