Otyrarda Táýelsizdiktiń 25 jyldyǵyna oraı merekelik is-shara ótkizildi

ShYMKENT. QazAqparat - Búgin el Táýelsizdiginiń 25 jyldyǵyna oraı Otyrar aýdany Sháýildir aýylynda 16 jeltoqsan - QR Táýelsizdik kúnine arnalǵan «Táýelsizdik tuǵyrym» taqyrybynda merekelik kontsert bolyp ótti, dep habarlaıdy aýdan ákimdiginiń baspasóz qyzmeti.

Shırek ǵasyrlyq Táýelsizdigimizdi ulyqtaǵan sharaǵa aýdan ákiminiń orynbasary Ábdiǵalı Júnisov qatysty. Aýyl turǵyndaryn quttyqtaý sózinde «Táýelsizdiktiń alǵashqy jyldarynan-aq elimiz egemendiktiń eń negizgi alǵy sharttaryn jasaı aldy. Bárinen buryn kóp ultty, kóp dindi elde halyqtyń aýyz birligin saqtaýǵa qol jetkizildi. Qazaqstandy meken etken barlyq ulttardyń múddesin ortaqtastyra alǵany - Elbasymyzdyń danalyq saıasatynyń aıqyn aıǵaǵy edi»,- degen aýdan ákiminiń orynbasary Táýelsizdigimizdiń baıandy bolýyn tiledi. Sondaı-aq, aýyl ákimi Ǵalym Qydyr elimizdiń shırek ǵasyrda jetken jetistikterine jáne aýdanymyzda jasalyp jatqan kóńil qýantarlyq ıgi isterge toqtalyp, qoǵamdyq jumystarǵa belsene qatysyp júrgen azamattarǵa merekelik Alǵys hat tapsyryp, quttyqtaýyn jetkizdi. Shara barysynda Sháýildir aýylynyń ardagerler keńesiniń tóraǵasy M.Temirbekov Táýelsizdigimizdiń tuǵyrly da, ǵumyrly bolýy óskeleń urpaqqa amanat ekendigin aıtyp, aýyl aqsaqaldary atynan merekemen quttyqtady. 

Saltanatty shara sońy jergilikti ónerpazdardyń kontserttik baǵdarlamasyna ulasyp, kópshilikke kóterińki kóńil-kúı syılady.