Otyrarda Shámshi Qaldaıaqovtyń qurmetine saıabaq pen eskertkish ashyldy
Qara topyraǵynda tabanynyń izi qalǵan, óz esimimen atalatyn aýylda el ıgiligine berilgen saıabaq tórinde asa kórnekti sazger, mýzykanyń áıgili maıtalmany, Qazaqstan mádenıetine eńbegi sińgen qaıratker, Qazaqstannyń halyq ártisi Shámshi Qaldaıaqovtyń eńseli eskertkishi de boı kóterdi. Saltanatty sharaǵa aýdan basshysy Erlan Aıtahanov, zııaly qaýym ókilderi men aýdan turǵyndary qatysty.
Saıabaqtyń ashylý saltanatynda aýdan ákimi Erlan Aıtahanov aýyl turǵyndaryn Táýelsizdiktiń 27 jyldyq mereıli merekesimen quttyqtap, kompozıtor saıabaǵy men eskertkishiniń lentasyn qıdy.
«Ult Kóshbasshysy Nursultan Nazarbaev «Bolashaqqa baǵdar: rýhanı jańǵyrý» maqalasynyń «Týǵan jer» baǵdarlamasynda Otanymyzdy kórkeıtip, qazaqstandyqtardyń jaǵdaıyn jaqsartý úshin kóptegen jumystardy atqarý kerek ekenin atap kórsetken bolatyn. Osy baǵytta aýdanymyzda birneshe aýqymdy jumystar jumystar atqarylyp keledi. Munyń bári Táýelsiz memleketimizdiń beıbit kúnderde qol jetkizgen jetistikteri dep bilemin. Sondaı-aq, Elbasynyń jýyrda ǵana jaryqqa shyqqan «Uly dalanyń jeti qyry» maqalasynyń «Uly dalanyń uly esimderi» bóliminde de uly tulǵalar shoǵyryn keńinen nasıhattap, eskertkishter men tulǵalar galereıasyn jasaý syndy birqatar mańyzdy bastama kótergeni belgili. Bar qazaqty ásem ánimen áldılep, óner kókjıegin syrly ánderimen kómkergen sazger atyndaǵy saıabaq aýyl turǵyndary men onyń qonaqtary úshin tamasha demalys orny bolmaq»,-dedi Erlan Aıtahanov.
Aýmaǵy atshaptyrym demalys orny oıý-órnekti qorshaýmen bekitilip, qylqan japyraqty 100 túp aǵash jáne jergilikti klımatqa beıimdelgen 600 túp qara aǵash otyrǵyzylǵan. Ádemi aıaq joldardyń boıyna 14 oryndyq qoıylyp, kelýshilerdiń demalýyna jaǵdaı jasaldy. Jaýyn men ystyq kúnnen qorǵan bolatyn 4 raton da saıabaqtyń árin kirgizip tur. Kóktem aılarynda saıabaq ishi gúlmen kómkerilmek.
Shara barysynda memlekettik gımn avtory qurmetine boı kótergen nysanǵa aýyl qarııalary júrekjardy lebizderin aıtyp, aq batasyn berdi. Odan ári saltanatty sharada uly sazgerdiń balalyq shaǵynan kórinister qoıylyp, qazaq dalasyn ánmen terbetken sazgerdiń ánderi shyrqaldy.