Otyrarda memlekettik qyzmetshilerge arnalǵan semınar-keńes ótti

OTYRAR. QazAqparat – QR Memlekettik qyzmet isteri agenttiginiń Túrkistan oblysy boıynsha departamentiniń basshysy, Ádep jónindegi keńes tóraǵasy Bolat Isaqov bastaǵan top Túrkistan oblysy Otyrar aýdanyna arnaıy is-saparmen keldi. Qonaqtar aýdandaǵy jergilikti atqarýshy organdardyń memlekettik qyzmetshilerimen semınar-keńes ótkizdi, dep habarlaıdy QazAqparat tilshisi.

Semınarda arnaıy baıandama jasaǵan Bolat Álmuhanuly Prezıdent Q.Toqaevtyń Qazaqstan halqyna arnaǵan «Syndarly qoǵamdyq dıalog-Qazaqstannyń turaqtylyǵy men órkendeýiniń negizi» atty Joldaýyndaǵy ózi basshylyq etetin salaǵa júktelgen mindetterge erekshe toqtaldy. Sondaı-aq memlekettik qyzmetshilerdiń turǵyndarǵa sapaly qyzmet kórsetip, kelgen hattarǵa der kezinde jaýap berý qajettigin atap ótti.

Sonymen qatar jergilikti halyqqa qyzmet kórsetý ortalyqtaryndaǵy beriletin qujattardyń 70 paıyzyn ortalyqqa barmaı-aq alýǵa bolatyndyǵyn, alaıda kópshilik elektrondy formatqa kóshýdiń tıimdiligin óz dárejesinde paıdalanbaı otyrǵandyǵyn sóz etti.

Semınarda sóz alǵan aýdan ákimdiginiń apparat basshysy, Otyrar aýdany boıynsha Ádep jónindegi ókil Aıdos Máýlen Ádep kodeksi zańnamalaryn saqtaý jáne memlekettik qyzmetkerlerdiń qoǵamdaǵy bedelin arttyrý máselelerin aıtyp ótti. Qyzmet barysyndaǵy qarym-qatynas mádenıetin saqtaý men sybaılas jemqorlyqqa qarsy tózbeýshilik mádenıetin qalyptasyrý baǵytynda habarlama jasady.

Jıyn barysynda kópshilik tarapynan qoıylǵan saýaldarǵa departament mamandary jan-jaqty jaýap qaıtardy.

Semınardan soń departament basshysy men qyzmetkerleri aýdandaǵy «Azamattarǵa arnalǵan úkimet» memlekettik koorporatsııasy KEAQ Túrkistan oblysy boıynsha Otyrar aýdandyq bólimi, aýdandyq «Halyqty jumyspen qamtý ortalyǵy», Qoǵam aýyl okrýgi ákimi apparattarynda bolyp, atalmysh mekemelerdiń jumystarymen tanysty.

«Nur Otan» partııasy aýdandyq fılıalynda bolǵan departament basshysy Bolat Isaqov aýdan turǵyndaryn jeke qabyldap, olardyń saýaldaryna tuşymdy jaýap berdi.