Otyrarda qolóner sheberleriniń kórmesi ótýde

ShYMKENT. QazAqparat - Ońtústik Qazaqstan oblysynyń Otyrar aýdanynda qolóner sheberleriniń kórmesi ótýde. Otyrar memlekettik arheologııalyq qoryq-mýzeıinde ótken kórmege 40-qa jýyq qolóner sheberleri men qylqalam ıeleriniń 500-den asa týyndysy qoıyldy, dep habarlaıdy QazAqparat tilshisi.

Atalǵan shara Astananyń 20 jyldyǵyna oraı, sondaı-aq  18 mamyr Halyqaralyq mýzeı kúnine arnaldy. Kórmeniń ashylý saltanatynda aýdan Erlan Aıtahanov quttyqtaý sóz sóılep, sharanyń mańyzdylyǵyna toqtalyp ótti.

«Qazaq qolóneriniń ózindik kópǵasyrlyq shejiresi bar. Ol halyqtyń ómirimen, turmysymen birge damyp, urpaqtan urpaqqa berilip, ata-babalarymyzdyń  erteden qasterlep baǵalaı bilgen dúnıesi. Qolóner dúnıe júziniń ár halqynda bar. Sonymen qatar ár eldiń, ár halyqtyń tarıhı damýyna, turmysyna, tarıhı ereksheligine jáne estetıkalyq talǵamyna baılanysty ózindik ereksheligimen óshpes iz qaldyrǵan. Osy ónerdi kásip etken sheberler Otyrar óńirinde de az bolmaǵan. Olar  Tegis usta, Tegisuly Aryn, Syzdyq Usta, Syzdyquly Nadaıymbek, Qaldaıaq usta t.b.  Búginde olardyń qolynan shyqqan buıymdary kóne jádiger bolyp murajaıda saqtalsa, esimderi tarıh betterinde jazýly. Sondaı-aq, Jańabek Mamyt, Baqytbek Amangeldıev, Januzaq Erimbetov t.b. otyrarlyqtar osy kisilerdiń búgingi jalǵasy ispetti»- dedi Erlan Aıtahanov.

Kórmege qatysýshylar óz týyndylaryn kópshilikke kórsetýmen qatar satylymǵa da shyǵara alady. Sharaǵa qatysýshylar Otyrar memlekettik arheologııalyq qoryq mýzeıiniń ótken tarıhynan syr shertetin «Otyrar Ermıtajy» atty kórmesimen de tanysty.