Otyrarda elimizdegi tuńǵysh sapar ortalyǵy ashyldy
QR Mádenıet jáne sport mınıstrliginiń qoldaýymen Otyrar qalajurty mańynan salynǵan Sapar ortalyǵynyń ashylý saltanatyna Mádenıet jáne sport vıtse-mınıstri Eldos Ramazanov, Qazaqstannyń halyq aqyny Áselhan Qalybekova, kompozıtor, shámshitanýshy, Shymkent qalasy ákiminiń keńesshisi Qaldybek Qurmanáli qatysyp, lentasyn qıdy.
«N.Nazarbaevtyń «Bolashaqqa baǵdar: Rýhanı jańǵyrý» maqalasy aıasynda salynǵan «Otyrar memlekettik arheologııalyq qoryq-mýzeıi janyndaǵy Sapar ortalyǵy Otyrar oazısiniń mádenı murasyn elimiz ben shetelderde nasıhattaý, tarıhı-mádenı mura nysandaryn qorǵaý men olardyń saqtalýyn qamtamasyz etý, sonymen qatar, týrızm salasynyń zamanaýı talaptaryna saı týrıstik ortalyq jasaý maqsatynda jumys atqarady», delingen habarlamada.
Sonymen qatar Otyrar qoryq-mýzeıiniń bazasynda kommýnıkatsııa, mádenı aqparat jáne shyǵarmashylyq ınnovatsııalardy damytý baǵytynda da qyzmet atqaratyn biregeı nysanǵa aınalmaq.
Otyrar memlekettik arheologııalyq qoryq-mýzeıiniń fýnktsııalaryn mádenı-aǵartý men ımıdjdik ortalyq deńgeıine deıin keńeıtip, tarıh ǵylymy, arheologııa, restavratsııa, ónertaný, etnografııamen ushtastyrýǵa jaǵdaı jasaý da josparlanǵan.
Sapar ortalyǵy mýzeı qoryna túsip otyratyn eksponattar úshin birinshi jáne ekinshi qabattarda ekspozıtsııalyq zaldarynan jáne mýzeı mamandary jáne Otyrar qalajurtynda qazba júrgizetin arheologtar úshin 16 oryndyq jataqhana ǵımaratyn qamtıdy.
Otyrardaǵy shara «Otyrar qalajurty - Qazaqstanda arheologııalyq eskertkishterdi zertteý, saqtaý jáne paıdalaný isiniń ozyq úlgisi» taqyrybyndaǵy respýblıkalyq ǵylymı-tájirıbelik konferentsııamen jalǵasyn tapty.
Konferentsııa barysynda arheologııa salasynyń jetistikteri, Otyrar qalajurtyndaǵy nysandardaǵy restavratsııalyq jumystar nátıjeleri jáne mýzeı qoryn jasaqtaý, restavratsııalaý, saqtaý máseleleri boıynsha baıandamalar oqylyp, mádenı ınfraqurylymdy keńeıtý, tarıhı-mádenı qundylyqtardy dáripteý jáne nasıhattaý jumystaryn júrgizý, mádenı muralardy zertteýdiń tolyqtaı júıesin qurý máseleleri talqylandy.
Jıynǵa kelgen qonaqtar týrısterge qolaıly jaǵdaı jasaý maqsatynda Arystanbab kesenesi men Otyrar qalajurtynyń syrtqy qaqpa aldyna júrgizilgen abattandyrý jumystarymen tanysty.
Saltanatty sharaǵa Qazaqstan Respýblıkasy Mádenıet jáne sport mınıstrliginiń ókilderi, BAQ ókilderi, oblystyq jáne jergilikti basqarý organdary, respýblıkalyq joǵary oqý oryndary men ǵylymı zertteý ınstıtýttarynyń ǵalymdary, zııaly qaýym, týrıstik agenttik ókilderi, respýblıkalyq jáne oblystyq mýzeı qyzmetkerleri ulttyq-mádenı ortalyqtar, orta bilim berý mekemeleriniń qyzmetkerleri qatysty.