Otyrarda 84 jastaǵy qarııa aýyldastaryna kópir salyp berdi

OTYRAR. QazAqparat - Túrkistan oblysy, Otyrar aýdany, Aqtóbe aýylynyń turǵyny, zeınetker Ájekbar Qorǵanbekov jaıaý júrginshiler kóp júretin «Aqtóbe» kanalynyń boıyna shaǵyn kópir salyp berdi, dep habarlaıdy QazAqparat tilshisi.

Kanaldyń eki jaǵasyn jaǵalaı otyrǵan turǵyndar buǵan deıin eski kópirden ótip, mektepke baratyn balalarynyń jaǵdaıyna alańdap kelgen edi. Atalǵan kópirden otyzdan asa otbasynyń 60-qa jýyq balasy mektepke baryp-qaıtady.

Búginde jańadan salynǵan kópir ata-analardyń ýaıymyn seıiltip, turǵyndarǵa qýanysh syılady. Atalǵan kópirdiń lentasy qıylyp, turǵyndar osy ónegeli isimen elge syıly bolǵan Ájekbar qarııaǵa alǵysyn jaýdyrdy.

Uzaq jyldar boıy mehanızator bolyp eńbek etken Ájekbar Qorǵanbekov búginde 84 jasqa tolyp otyr. Beınetiniń zeınetin kórgen abyz aqsaqal kópirdi salý máselelesi kóterilgende qarap otyra almaǵanyn, týǵan elge, týǵan jerge azamattyq paryzyn osyndaı ónegeli isterimen óteýdi jón sanaǵanyn aıtady.

«Halyq kópirdiń ıgiligin kórsin, elimiz órkendep, aýyldarymyz kórkeıe bersin», – deıdi Ájekbar ata.