Otyrar aýdanynda kópbalaly otbasy baspanaly boldy

ShÁÝІLDІR. QazAqparat - Búgin - Oraza aıtynyń sońǵy kúni Túrkistan oblysy Otyrar aýdanynda kópbalaly Músirepovter otbasy baspanaly boldy. Páterden páterge kóship, turmys qıyndyǵyn kórip júrgen otbasyǵa jeke kásipker Baýyrjan Qanybekov pen Temir jalpy orta mektebin 1994 jyly bitirgen túlekter bes bólmeli úıdiń kiltin tartý etti, dep habarlaıdy QazAqparat tilshisi.

Baspanaǵa ıe bolyp, qýanyshqa kenelgen januıanyń shańyraǵyna aýdan ákimi Erlan Aıtahanov arnaıy baryp, týǵan jerin túletýge atsalysqan jáne qaıyrymdylyq jasaǵan azamattarǵa alǵysyn bildirdi. Aýdan ákimdigi atynan kópbalaly otbasyǵa tońazytqysh pen kir jýatyn mashına, úıge qajetti jıhazdar tartý etti.

«Qıyn sátte qol ushyn sozyp, kórsetilgen kómek eshqashan umytylmaıdy. Asyldyń kózi Baýyrjan jyl saıyn muqtaj otbasylardy azyq-túlikpen qamtamasyz etip, kómek kórsetip keledi. Aýyldaǵy qaıyrymdylyq sharasy munymen toqtamaıdy. Tamyz aıynda temirlikter taǵy da qýanyshty sáttiń kýási bolmaq. Temir mektebin 1999 jyly bitirgen túlekter ózderiniń kópbalaly synyptasyna 3 bólmeli úı salyp jatyr. Qazir qurylys jumysy qyzý júrýde. Munan bólek, bıyl aýdandyq bıýdjet jáne demeýshiler esebinen 40 kópbalaly otbasynyń úıi aǵymdaǵy jáne kúrdeli jóndeýden ótedi», - dedi Erlan Aıtahanov.