Otstavkadaǵy sýdıalarǵa MÁMS júıesinde medkómek alý quqyǵy berilmek
«Qarjy mınıstrliginiń aqparaty boıynsha 2020 jylǵy 1 qańtardan bastap mindetti áleýmettik medıtsınalyq saqtandyrýdy engize otyryp, 2020-2022 jyldarǵa arnalǵan respýblıkalyq bıýdjette Áleýmettik medıtsınalyq saqtandyrý qoryna jarna tóleýden bosatylǵan azamattardyń 15 sanaty boıynsha memlekettiń jarnalaryna, onyń ishinde zeınetkerlerge jalpy somasy 1 154868,4 mln teńge, atap aıtqanda 2020 jylǵa – 316975,2 mln teńge, 2021 jylǵa – 390631,9 mln teńge, 2022 jylǵa – 447261,3 mln teńge somasynda qarajat kózdelgen. Mindetti áleýmettik medıtsınalyq saqtandyrý týraly» Zańnyń 5-babyna sáıkes otstavkadaǵy sýdıalardyń MÁMS júıesinde medıtsınalyq kómek alýǵa quqyǵy joq. Óıtkeni zeınetkerlik zańnamaǵa sáıkes sýdıalardyń «zeınetaqy tólemderin alýshylar» degen mártebesi joq», - dep atap ótedi Úkimet basshysy.
Onyń atap ótinshe, «Qazaqstan Respýblıkasynda zeınetaqymen qamsyzdandyrý týraly» Zańǵa sáıkes ómir boıǵy aı saıynǵy qamtylym alatyn otstavkadaǵy sýdıalarǵa jasyna baılanysty zeınetaqy tólemderi nemese eńbek sińirgen jyldary úshin zeınetaqy tólemderi taǵaıyndalmaıdy. Otstavkadaǵy sýdıalar bıýdjet qarajaty esebinen ómir boıǵy aı saıynǵy qamtylym alatyn adamdar sanatyna jatady jáne zeınetaqy tólemderin alýshylar bolyp tabylmaıdy. Bul rette, otstavkadaǵy sýdıalarǵa ómir boıǵy aı saıynǵy qamtylym zeınetaqy tólemderine kirmeıdi. Óıtkeni «Sot júıesi men sýdıalardyń mártebesi týraly» Konstıtýtsııalyq zańmen retteledi.
«Osyǵan baılanysty, Joǵarǵy Sot joǵaryda atalǵan Zańǵa ómir boıǵy aı saıynǵy qamtylym alatyn sýdıalardy memleket esebinen MÁMS-ke jarnalar tóleýden bosatylatyn adamdar sanatyna qosý bóliginde túzetý engizý jónindegi máselege bastama jasap otyr. Ala esepteýler boıynsha jylyna 18 mıllıon teńge mólsherinde qosymsha qarajat talap etiledi. Bul rette, Densaýlyq saqtaý mınıstrligi qazirgi ýaqytta memleket halyqtyń 15 sanatyn (balalar, zeınetkerler, múgedekter, «Altyn alqa», «Kúmis alqa» alqalarymen marapattalǵan nemese buryn «Batyr ana» ataǵyn alǵan, sondaı-aq I jáne II dárejeli «Ana dańqy» ordenderimen nagradtalǵan kóp balaly analar) jarnalar tóleýden bosatatynyn atap ótedi jáne bul shamamen 10,8 mln adamdy quraıdy. Bul obektıvti sebepter boıynsha kirister ala almaıtyn nemese kiristeri joq el halqynyń jartysynan kóbi», - dedi Asqar Mamın.
Úkimet basshysynyń aıtýynsha, Joǵarǵy sottyń usynysy zańnamada belgilengen tártippen múddeli memlekettik organdarmen pysyqtalýda. Osy jylǵy 10 aqpanda MÁMS júıesi boıynsha medıtsınalyq qyzmet usyný máseleleri Densaýlyq saqtaý, Eńbek jáne halyqty áleýmettik qorǵaý jáne Qarjy mınıstrlikteriniń ókilderin shaqyra otyryp, Joǵarǵy sotta ótken jeke keńeste qaralyp, onda Densaýlyq saqtaý mınıstrligi Zańnyń 14-babynyń aıasynda MÁMS-ke jarnalardy tóleý tetigin usynǵa. Zańnyń 14-babynyń 4-1-tarmaǵyna sáıkes «jarnalardy derbes tóleıtin adam» (derbes tóleýshiler) sanaty boıynsha MÁMS-ke jarnalar tóleýdi olardyń ózderi ne olardyń paıdasyna úshinshi tulǵa júzege asyrady. Basqasha aıtqanda, zeınetaqy tólemderin alýshy bolyp tabylmaıtyn zeınetkerlik jasqa tolǵan otstavkadaǵy sýdıalar úshin MÁMS-ke jarnalardy Joǵarǵy sot respýblıkalyq bıýdjet esebinen tóleı alady.
«Densaýlyq saqtaý mınıstrliginiń aqparaty boıynsha 2020 jylǵa osyndaı adamdar sany 620 adamdy quraıdy, onyń ishinde qazirgi ýaqytta 72 adam (onyń ishinde 56 adam – biryńǵaı jınaqtaý zeınetaqy qorynan zeınetaqy tólemderin alýshylar, 16 adam – respýblıkalyq bıýdjet qarajaty esebinen jasy boıynsha zeınetaqy tólemderin alýshylar) zeınetaqy tólemderin alýshylar retinde saqtandyrylǵan bolyp tabylady. Qalǵan adamdar úshin MÁMS-ke jarnalar tóleýge arnalǵan shyǵystardyń somasy aıyna 1,2 mln teńgeni nemese jylyna 14 mln teńgeni quraıdy. Sot organdaryna kórsetilgen qarajatty bólý máselesin belgilengen tártippen Respýblıkalyq bıýdjet komıssııasynyń qaraýyna shyǵarý josparlanýda. Baıandalǵandardy nazarǵa ala otyryp, usynylyp otyrǵan tártip osy jylǵy 1 sáýirden bastap zeınetkerlik jasqa tolǵan otstavkadaǵy sýdıalardy MÁMS júıesindegi medıtsınalyq kómekke quqyqpen qamtamasyz etýge múmkindik beredi»,- dedi Premer-Mınıstr.