Ótip bara jatqan jyl nesimen este qaldy – Erlan Qarın paıymy
Reformalar baǵytynyń jalǵasy
Memleket basshysy qańtardaǵy suhbatynda jáne Ulttyq quryltaıdyń úshinshi otyrysynda búkil 2024 jylǵa arnalǵan ishkisaıası jumystardyń kúntártibi men mazmunyn aıqyndap berdi.
Jyl boıy áleýmettik mańyzy bar zańdardyń tutas kesheni ázirlenip, qabyldandy. Qoǵamdyq petıtsııalar ınstıtýty iske qosyldy. TMD jáne Ortalyq Azııada alǵash ret atom elektr stantsııasy qurylysyna qatysty referendým ótti, ony talqylaý eń uzaq elektoraldyq naýqanǵa aınaldy. Aýyl ákimderin saılaý jalǵasyn tapty. Onomastıka, eskertkishter men geraldıka, memlekettik jáne qoǵamdyq nagradalar salasyn retke keltirý jumystary bastaldy.
Áleýmettik-gýmanıtarlyq saladaǵy memlekettik bastamalardy kezeń-kezeńmen júzege asyrý jalǵasyn tapty: «Ulttyq qor balalarǵa!» baǵdarlamasy, «Jaıly mektep» ulttyq jobasy, mektepterdegi tárbıe jumysynyń biryńǵaı baǵdarlamasy, jas ǵalymdarǵa arnalǵan jańa granttar men taǵylymdamalar, jumysshy mamandyqtarynyń mártebesi men bedelin arttyrý.
Jańa syn-qaterlerge jaýap
Memlekettik apparat týyndaǵan syn-qaterlerdi tabysty eńsere bildi. Prezıdent saıasaty buryn-sońdy bolmaǵan halyqaralyq shıelenis jaǵdaıynda elimizdegi beıbitshilik pen kelisimniń saqtalýyna, Qazaqstannyń egemendigi men qaýipsizdiginiń nyǵaıýyna septigin tıgizdi.
Alapat sý tasqynynyń zardaptary qysqa ýaqyttyń ishinde joıylyp, zardap shekkenderdiń barlyǵyna memleket tarapynan jan-jaqty kómek kórsetildi. Áıelder men balalardyń quqyqtaryn qorǵaý, sondaı-aq balalar sýıtsıdimen kúresti úılestirý salalary boıynsha júıeli sharalar qabyldandy.
Jańa qoǵamdyq ádep
Jańa qoǵamdyq qundylyqtardyń krıstaldaý protsesi jalǵasty. Ádildik, zańdylyq pen tártip qaǵıdalary tek memlekettik organdardyń ǵana emes, sonymen birge búkil qoǵamnyń negizgi narratıvine aınaldy.
Azamattyq qoǵam Prezıdenttiń «Taza Qazaqstan» bastamasyna, sondaı-aq turmystyq zorlyq-zombylyqqa, agressııa men vandalızmge, nashaqorlyqqa, lýdomanııaǵa jáne ysyrapshyldyqqa qarsy turýǵa belsendi atsalysty.
Minez-qulyq normalary men ádep saqtaý taqyryby barǵan saıyn qoǵamdyq talqylaýlardyń ózegine aınala bastady.
Qoǵam birigýiniń damýy
Ózekti taqyryptar tóńireginde oryn alyp jatqan pikirtalastarǵa qaramastan, tutastaı alǵanda, bılik pen qoǵamnyń bolashaqqa degen ortaq túsinigi men kózqarasy bar. Jaqynda Qazaqstannyń strategııalyq zertteýler ınstıtýty júrgizgen saýalnamaǵa sáıkes, azamattardyń 77,7 paıyzy Qazaqstan durys baǵytta damyp kele jatyr dep esepteıdi. Qoǵamdyq qoldaý aldaǵy 2025 jyly reformalardy jalǵastyrýdyń kúshti tiregi sanalady.
Eske sala keteıik, buǵan deıin Erlan Qarın endi memlekettik nagradalar júıesine 9 jańa qurmetti ataq engiziletinin aıtqanyn jazǵan bolatynbyz.