Ótken jyly ulttyq kompanııalar men holdıngter qazaqstandyq qamtý boıynsha mindettemelerin oryndamady - S.Ahmetov
Bul týraly búgin qazaqstandyq qamtý máselesin damytýǵa arnalǵan jıyn ótkizgen QR Premer-Mınıstriniń birinshi orynbasary Serik Ahmetov aıtty.
Alqaly jıyndy ashqan S.Ahmetovtiń aıtýynsha, qazaqstandyq qamtý kólemin arttyrý jumystary júıeli túrde Úkimet tarabynan jolǵa qoıylǵan. Degenmen de osyǵan qaramastan ótken jyldyń qorytyndysynda josparlanǵan maqsatty kórsetkishter oryndalmady.
«Ekonomıkalyq damý jáne saýda mınıstrliginiń málimetteri boıynsha, ótken jyly qazaqstandyq qamtý boıynsha maqsatty kórsetkishterdi ásirese, bizdiń taý-ken ónerkásibiniń, munaıgaz sektorynyń jáne «Samuryq-Qazyna qorynyń kompanııalar tobyna kiretin jer qoınaýyn paıdalanýshylar tolyq kólemde oryndaǵan joq. Ulttyq kompanııalar men holdıngterdiń satyp alýlaryndaǵy qazaqstandyq qamtý úlesi taýarlar boıynsha josparlanǵan 53 paıyzdyń 27,1 paıyzyn, jumystar men qyzmetter boıynsha josparlanǵan 82 paıyzdyń 65 paıyzyn ǵana qurady», - dedi ol.
Jıynǵa Parlament depýtattary, mınıstrlikter men vedomstvonyń ókilderi qatysty.