Ótken jyly paıdalanýǵa berilgen baspana sany 8,8 paıyzǵa azaıdy

ASTANA. QazAqparat – 2022 jyly 15,4 mln sharshy metr turǵyn úı paıdalanýǵa berildi. Bul týraly búgin Úkimet otyrysynda Ulttyq ekonomıka mınıstri Álibek Qýantyrov aıtty, dep habarlaıdy QazAqparat tilshisi.

«Bir jyl ishinde oryndalǵan qurylys jumystarynyń kólemi 9,4 paıyzǵa ulǵaıdy. Kórsetkishtiń oń ósýi 18 óńir boıynsha tirkeldi. Qurylys-montajdaý jumystarynyń eń joǵarǵy ósýi Aqmola, Almaty, Atyraý oblystarynda jáne Shymkent qalasynda baıqaldy. 2022 jyly 15,4 mln sharshy metr turǵyn úı paıdalanýǵa berildi, bul 2021 jylmen salystyrǵanda 8,8 paıyzǵa kem», - dedi mınıstr.

Onyń atap ótýinshe, bul kórsetkishtiń tómendeýi Almaty jáne Astana qalalarynda, sondaı-aq Ulytaý, Mańǵystaý, Soltústik Qazaqstan jáne Atyraý oblystarynda paıdalanýǵa berilgen turǵyn úı sanynyń azaıýy esebinen bolyp tur.

«Basqa 14 óńirde oń ósý tirkeldi. Eń joǵarǵy kórsetkishter Pavlodar, Shyǵys Qazaqstan, Jetisý oblystarynda jáne Shymkent qalasynda baıqaldy», - dedi ol.

Mınıstrdiń dereginshe, aýyl sharýashylyǵynyń jalpy shyǵarylymy 9,1 paıyzǵa ulǵaıdy.

«Saladaǵy óndiristiń oń ósýi 15 óńirde tirkeldi. Eń joǵarǵy ósimdi Qostanaı, Aqmola, Batys Qazaqstan jáne Soltústik Qazaqstan oblystary kórsetti», - dedi Álibek Qýantyrov.