Ótken jyly Pavlodar oblysynda 33,2 myń adam jumyspen qamtyldy
«Aýyr kezeńde halyqty jumyspen qamtý sharalary toqtaǵan joq. Atqarylǵan jumystardyń nátıjesinde 33,2 myń adam jumysqa ornalasty. 16 myńnan astam turaqty jumys orny quryldy.
Jumyspen qamtý jol kartasy boıynsha 227 joba qolǵa alynyp, 6,4 myń adam qyzmetke turdy. Baǵdarlama óńir boıynsha 93,4%-ǵa aıaqtaldy.
«Bıznes bastaý» jobasy sheńberinde 1750 adam oqytylyp, olarǵa jalpy somasy 2,4 mlrd teńgege nesıe berildi. Sonymen qatar, jańa bıznes-ıdeıalardy damytý úshin 1971 grant bólindi.
Daǵdarysqa qarsy sharalar ekonomıkany turaqtandyrýǵa ǵana emes, halyqty áleýmettik qoldaýǵa da baǵyttaldy. Máselen, 294,8 myń adamǵa áleýmettik kómek berildi. 5353 otbasyǵa (nemese 22454 adam) ataýly áleýmettik kómek, 4008 balaǵa (1 jastan 6 jasqa deıingi balalarǵa AÁK alýshylar ishinen kepildendirilgen áleýmettik paket) azyq-túlik jáne turmystyq zattar, tótenshe jaǵdaı kezinde 172 myń adamǵa 42500 teńge jáne mamyr-maýsym aılarynda 57 myńnan astam adamǵa (jeke shoty bar azamattarǵa) kommýnaldyq qyzmetterdi óteýge kómek berildi», - dep málimdedi Pavlodar oblysy ákimdiginiń baspasóz qyzmeti.
Budan bólek, óńirde halyqty turǵyn-úımen qamtamasyz etý baǵytyndaǵy jobalar da iske asqan. Baspasóz qyzmetiniń málimetine sáıkes, jyl basynan beri oblysta 31 kóp qabatty turǵyn úı salý jumystary qolǵa alynǵan. Osylaısha turǵyn úı qurylysy salasyndaǵy ósim 1,4%, al oblys boıynsha jalpy qurylys sektoryndaǵy ósim kórsetkishi 13%-dy qurady. Nátıjesinde áleýmettik qorǵaýǵa alynǵan 1045 adam jańa páter kiltin aldy. Bul 2019 jyldyń kórsetkishterimen salystyrǵanda 5 ese kóp.