Ótken jyly Ózbekstanǵa 1,5 mln-nan astam qazaqstandyq týrıst barǵan

TAShKENT. QazAqparat – Ózbekstannyń týrıstik salasy qalpyna keltirilip jatyr. Ótken jyly sheteldik týrıster aǵyny 2,8 ese ósken, dep habarlaıdy QazAqparat menshikti tilshisi.

Ózbekstan memlekettik statıstıka komıtetiniń málimetinshe, 2022 jyly Ózbekstanǵa týrıstik maqsatta 5,2 mln sheteldik azamat kelgen, bul aldyńǵy jylǵy kórsetkishten 3,4 mln nemese 2,8 ese artyq.

Barlyq sheteldik týrısterdiń úshten bir bóligin Qazaqstan azamattary qurady - 1 551,1 myń adam. Sondaı-aq, osy tizimdegi úshtikke Ózbekstanmen kórshiles elder kirdi: Tájikstan – 1447,1 myń týrıst, Qyrǵyzstan – 1356,9 myń týrıst.
Reseı Federatsııasynan kelgen qonaqtar aǵyny 567,7 myń adamdy qurady. Alys shetelden 277 myń týrıst keldi, onyń ishinde Túrkııadan – 75,6 myń qonaq, Ońtústik Koreıadan – 19,9 myń, Germanııadan – 17,7 myń, Úndistannan – 16,8 myń, AQSh-tan - 13,1 myń adam.
Buǵan deıin 2023 jyldyń 2 qańtarynan bastap Ózbekstannyń bes áýejaıynda Tax Free baǵandary jumys isteı bastaǵanyn habarlaǵan edik, onda sheteldik týrıster satyp alynǵan taýarlar úshin QQS somasyn qaıtara alady.