Ótken jyly qos azamattyǵy bar 138 adam elden qýylǵan

ASTANA. QazAqparat – Byltyr qos azamattyǵy bar 841 adam ákimshilik jaýapqa tartylyp, onyń 138-i elden shyǵaryldy. Bul týraly Іshki ister mınıstrliginde ótken onlaın-brıfıngide vedomstvo ókili Shuǵyla Turlybek aıtty, dep habarlaıdy QazAqparat tilshisi.

«Ótken jyly qos azamattyǵy úshin 841 adam ákimshilik jaýapkershilikke tartyldy. Sottardyń sheshimimen 138 adam elden shyǵaryldy, qalǵandaryna aıyppul salyndy. Sońǵy 5 jylda azamattyq týraly zańnamany buzǵan 3 515 adam jaýapqa tartyldy. Onyń 3 myńnan astamyna aıyppul salyndy, 473-i elden shyǵaryldy. Barlyǵynyń qazaqstandyq azamattyǵy joıyldy», - dep toqtaldy Shuǵyla Turlybek.

Bıyl óziniń azamattaǵyn jasyryp, ózge eldiń kýáligin alǵysy keletinder úshin jaýapkershilikti kúsheıtý josparlanyp otyr.

Atap aıtqanda, zańnamalyq aktilerge túzetýler engizilmek.

Aıta keteıik, qazir qos azamattyǵy bar ekenin jasyrǵany úshin zań buzýshyǵa 200 AEK-ke deıin aıyppul salynady nemese Qazaqstan aýmaǵynan shyǵarylady.