Ótken jyly Qazaqstannyń qonaq úıleri 5,5 mln týrısti qabyldady

NUR-SULTAN. QazAqparat – Byltyr qonaq kútý oryndary (qonaq úıler, meımanhanalar jáne t. b.) kórsetken qyzmetter kólemi 109 mlrd teńgege jetti. Bul 2020 jylǵa qaraǵanda 63,1%-ǵa artyq, dep habarlaıdy QazAqparat finprom.kz-qa silteme jasap.

Qyzmetterdiń basym bóligi Almatyda - 27,9 mlrd teńgege kórsetilgen. Jyldyq ósim 66,1%-ǵa artqan. Úzdik úshtikke, sondaı-aq elorda (20,3 mlrd teńge, 75,4 %-ǵa kóp) jáne Aqmola oblysy (10,5 mlrd teńge, 63,9%-ǵa kóp) kiredi.

Eń az qyzmet Qyzylorda oblysynda – 1,1 mlrd teńgege ǵana kórsetilgen.

2021 jyly qonaq kútý oryndary 5,5 mıllıon kelýshige qyzmet kórsetken. Bul onyń aldyndaǵy jylmen salystyrǵanda 52,9%-ǵa kóp.

Óńirlik bóliniste kelýshilerdiń basym bóligi – Almatyda. Munda 1,2 mln adamǵa qyzmet kórsetilgen. Aımaqtaǵy kelýshiler sany bir jylda 65,5%-ǵa artqan. Jetekshi óńirlerdiń qatarynda Nur-Sultan (751,1 myń adam, 78,4%-ǵa kóp) men Almaty oblysy (609 myń adam, 26,1%-ǵa) bar.

Eń az kelýshiler - Atyraý oblysynda. Munda týrıster sany birden 45,2%-ǵa, 46,3 myń adamǵa deıin qysqarǵan. Qyzmet kórsetiletin kelýshiler sanynyń azaıýy tek osy aımaqta baıqalǵan.

Ornalastyrý túrleri boıynsha eń tanymal oryndar meıramhanasy bar qonaq úıler bolyp otyr. Mundaı mekemelerge ótken jyly 2,7 mln adam toqtaǵan. 2020 jylǵa qaraǵanda birden 62,8% -ǵa artqan.

Sondaı-aq, 1,7 mıllıon adam meıramhanasy joq qonaq úılerde jáne 673 myń adam bir qabatty býngalolarda, aýyldyq úılerde, kottedjderde, shaǵyn úıler men páterlerde turýdy jón kórgen.